थप एकजनामा कोरोना संक्रमण पुष्टी भएपछि लम्की चुहा नगरपालिकाको एक क्षेत्र शिल गर्ने तयारी
<p>काठमाडौं। वीरगञ्‍जबाट आएर कैलालीको लम्कीस्थित क्‍वारेन्टाइनमा बसिरहेकी एक ५५ वर्षीया महिलामा कोरोना संक्रमण पुष्‍टि भएपछि स्थानीय प्रशासनले सो क्षेत्र शिल गर्ने तयारी गरेको छ। </p>
<p>लम्कीचुहा नगरपालिकाका प्रमुख महादेव बजगाईंले संक्रमित बसिरहेको स्थान र आसपास क्षेत्र पुरै शिल गर्ने तयारी भइरहेको देखापढीलाई जानकारी दिए।</p>
<p>“नगरपालिकाको १ नम्बर वडामा बस्‍ने महिलामा संक्रमण देखिएपछि अहिले यहाँ उच्च सतर्कता अपनाउन लागेका छौं,” उनले भने, “यो र आसपासका क्षेत्र शिल गरेर र्‍यापिड टेस्टको काम अघि बढाउन आवश्यक पहल भइरहेको छ।” लम्कीचुहा नगरपालिका, इलाका प्रहरी कार्यालय लम्कीलगायत स्वास्थ्यका कर्मचारीहरूले संक्रमण पुष्‍टि भएकी महिलाको कन्टयाक्ट ट्रेसिङको कामसमेत शुरु गरेका छन्। </p>
<p>उनका अनुसार ती महिलासहित १७ जना १७ चैतमा वीरगञ्‍जबाट लम्की पुगेका थिए। त्यहाँ लकडाउनका कारण अलपत्र परेपछि जिल्ला प्रशासन कार्यालय पर्साले बस रिजर्भ गरेर कैलालीको चिसापानीसम्म पुग्‍ने व्यवस्था मिलाएपछि उनीहरू यहाँ आइपुगेका हुन्। संक्रमित भेटिएकी महिला आफन्तको घरमा गएर बसेकी थिइन्।</p>
<p>“ती १७ जना नै लम्की पुगेपछि सबै आ-आफ्नो घरमा गइसकेका थिए,” नगर प्रमुख बजगाईंले भने, “स्थानीयवासीले बाहिरबाट मानिस आएर घरमा बसेको जानकारी गराएपछि ल्याएर हामीले क्‍वारेन्टाइनमा राखेका थियौं।”</p>
<p>“१८ चैतमा घर पुगेका उनीहरूलाई अर्कोदिन नै क्‍वारेन्टाइनमा ल्याएर राखिसकिएको थियो,” स्रोतले भन्यो, “अरू धेरै मानिससँग सम्पर्क नगरे पनि घरपरिवार र आफन्तसित सम्पर्क भएको हुन सक्छ।”</p>
<p>लम्की बहुमुखी क्याम्पसको क्‍वारेन्टाइनमा राखिएकी ती महिलासहितका १७ जनाको र्‍यापिड डाइगोनोस्टिक टेस्ट र थ्रोट स्वाब संकलन गरिएको थियो। १४ दिन क्‍वारेन्टाइनमा राखेर गरिएको दुवै परीक्षणमध्ये आरडीटी परीक्षणमा सबैको रिपोर्ट नेगेटिभ आएको थियो। तर, थ्रोटको स्वाबसहित राष्‍ट्रिय जनस्वास्थ्य प्रयोगशाला काठमाडौंमा गरिएको पुनः परीक्षणमा ती महिलाको रिपोर्ट भने पोजिटिभ आएको थियो। </p>
<p>संक्रमण पुष्‍टि भएपछि ती महिलालाई अहिले धनगढीस्थित सेती प्रादेशिक अस्पतालमा भर्ना गरिएको छ। उनमा पहिलेदेखि दम रोगको समस्या रहेको अस्पताल स्रोतले जनाएको छ। संक्रमित महिलासँगैका अन्य मानिसलाई पुनः क्‍वारेन्टाइनमा राखेर निगरानी थालिएको छ।</p>
<p>कैलालीको लम्कीमा भारतबाट आएका एक युवकमा यसअघि कोरोनाको संक्रमण पुष्‍टि भइसकेको छ। दुबईबाट आएका धनगढीका युवक र उनकी भाउजु पनि संक्रमित छन्। भारतबाटै आएका कञ्‍चनपुरका अर्का पुरुषमा पनि कोरोनाको संक्रमण पुष्‍टि भइसकेको छ।</p>
<p>वीरगञ्‍जबाट आएकी यी महिलामा संक्रमण पुष्‍टि भएपछि उनी वीरगञ्‍जबाटै संक्रमण भएर आएकी हुन् वा लम्की पुगेपछि हो भन्‍ने यकिन हुन सकेको छैन। इलाका प्रहरी कार्यालय लम्कीका प्रहरी निरीक्षक ज्ञानेन्द्र चन्दले संक्रमण भएकी भनिएकी महिलाको ट्राभल हिस्ट्री र कन्टयाक्ट ट्रेसिङसहितको विषयमा अनुसन्धान भइरहेको बताए।</p>
<p>नेपालमा भेटिएको यो १३ औं संक्रमणको केस पनि लोकल ट्रान्समिसन नै हुन सक्ने स्वास्थ्यकर्मीहरूको आकलन छ। यद्यपि, यसको स्वास्थ्य तथा जनसंख्या मन्त्रालयले औपचारिक पुष्‍टि गरिसकेको छैन। वीरगञ्‍जमा पुष्‍टि भएका तीनवटा केस र कैलालीको लम्कीको भेटिएको केसले उनीहरूमा कसरी संक्रमण भयो भन्‍ने चिन्ता थपिएको छ।</p>
प्रतिक्रिया दिनुहोस्
.jpg)
