मन्त्रीहरूलाई प्रधानमन्त्री ओलीकाे निर्देशन- ‘काेभिड-१९ काे जाेखिमबाट बच्न सबै तयारी गर्नू’
<p>काठमाडाैं। प्रधानमन्त्री केपी शर्मा ओलीले देशमा फैलिएको कोरोना भाइरसको सम्भावित जोखिमबाट बच्न सबै खालको तयारी गर्न मन्त्रीहरूलाई निर्देशन दिएका छन्।</p>
<p>बालुवाटारस्थित प्रधानमन्त्री निवासमा आज साँझ बसेको विपद् जोखिम न्यूनीकरण तथा व्यवस्थापन राष्ट्रिय परिषद्को तेस्रो बैठकमा उनले सबै खालको तयारी गर्न निर्देशन दिएका हुन्।</p>
<p>प्रधानमन्त्री ओलीले कोरोना भाइरसका साथसाथै आगलागी, चट्याङ, बाढीपहिरोबाट बच्नका लागि मन्त्रालयहरूले पूर्ण तयारी गर्न र जोखिम न्यूनीकरण गर्नका लागि आवश्यक तयारी गर्नुपर्नेमा जोड दिए।</p>
<p>प्रधानमन्त्रीले विपद्का सूचना सङ्कलन प्रभावकारीरूपमा गर्नुपर्ने, सूचनाहरूको सहीरूपमा तथ्याङ्क राख्नाका साथै प्रदेश र स्थानीय सरकारलाई त्यस विषयमा सहयोग गरी जनचेतनामूलक काम गर्न सबै मन्त्रीलाई निर्देशन दिए।</p>
<p>परिषद्का प्रमुख कार्यकारी अधिकृत तथा परिषद्का सदस्य सचिव अनिल पोखरेलका अनुसार बैठकमा कोरोना भाइरसलगायत सबै खालको विपद्‍बाट हुने जोखिमका विषयमा छलफल भएको छ।</p>
<p>बैठकमा परिषद्का अध्यक्ष तथा प्रधानमन्त्री ओली, प्रमुख प्रतिपक्षी दल नेपालका कांग्रेसका सभापति नेता शेरबहादुर देउवा, उपप्रधानमन्त्री तथा मन्त्रीहरू उपस्थित थिए। <em>रासस</em></p>
प्रतिक्रिया दिनुहोस्
.jpg)
