फ्रान्समा थपियो लकडाउन, ११ मे सम्म कायम रहने
<p>काठमाडौं। फ्रान्सेली राष्ट्रपति इमानुएल म्याक्रोनले १७ मार्च (४ चैत २०७६) देखि लागू गरिएको लकडाउन लम्बिने घोषणा गरेका छन्। ११ मे (२९ वैशाख २०७७)सम्म लकडाउन कायम रहने उनले घोषणा गरेका छन्।</p>
<p>उनले मेको मध्यबाट फ्रान्समा क्रमैसँग खुल्दै जाने बताए। राष्ट्रको नाममा सम्बोधन गर्दै राष्ट्रपति म्याक्रोनले फ्रान्स कोभिड-१९ को सामना गर्न तयार नहुँदै महामारी फैलिएकाले स्थिति नियन्त्रणमा आउन गाह्रो भएको उल्लेख गरे। उनले देशका विभिन्न क्षेत्रका अस्पतालहरूले अहिले कोभिड-१९ का बिरामीको चाप थेग्न नसकिरहेको बताए।</p>
<p>फ्रान्सको स्वास्थ्य मन्त्रालयले जनाए अनुसार त्यहाँ कोभिड-१९ का कारण मृत्यु हुनेहरूको संख्या १४ हजार ९६७ पुगेको छ। पछिल्लो २४ घण्टामा फ्रान्समा ५७४ जनाको निधन भएको अधिकारीहरूले बताएका छन्।</p>
<p>यसैबीच बेलायतका परराष्ट्र मन्त्रीले भने पछिल्लो २४ घण्टामा कोभिड-१९ का कारण निधन हुनेको संख्याले उच्च सीमा ननाघेकाले सकारात्मक संकेतहरू देखिएको बताएका छन्। अमेरिकामा भने पाँच लाख ५४ हजार ८४९ जनामा संक्रमण पुष्टि भएको छ भने २१ हजार ९४२ को निधन भइसकेको छ। -<em>बीबीसी</em>बाट</p>
<p> </p>
प्रतिक्रिया दिनुहोस्
.jpg)
