लकडाउन एकसाता थप्ने सरकारको तयारी, मन्त्रिपरिषद् बैठक बस्दै
<p>काठमाडौं। सरकारले कोभिड- १९ फैलिन नदिन लागू गरेको देशव्यापी लकडाउन अझै केहीदिन थप्ने तयारी गरेको छ।</p>
<p>यसअघि बसेको मन्त्रिपरिषद्को बैठकले तेस्रो पटकका लागि ३ बैशाखसम्म लकडाउन लागू गरेको थियो।</p>
<p>लकडाउनलाई निरन्तरता दिने वा नदिने र सरकारले कोभिड- १९ विरुद्ध अझै गर्नुपर्ने तयारी लगायतका विषयमा छलफल गर्न मन्त्रिपरिषद्को बैठक बस्दैछ।</p>
<p>आज बिहान ११ बजे प्रधानमन्त्री निवास बालुवाटारमा प्रधानमन्त्री केपी शर्मा ओलीले बैठक बोलाएको कृषि तथा पशुपन्छी विकास मन्त्री घनश्याम भुषालले <em>देखापढी</em>लाई बताए।</p>
<p>“बैठक कोभिड-१९ कै रोकथाम, उपचार र तयारीको बारेमा छलफल हुनेछ”, उनले भने, “सरकारले अहिलेसम्म गरेको कामको समिक्षा र अबको रणनीति नै मुख्य अजेण्डा छ।”</p>
<p>नेपालमा कोरोना संक्रमितको संख्या दिनहुँ बढिरहेका कारणले रोकथाम र नियन्त्रणका लागि लकडाउन बढाउनुपर्ने सरोकारवालाले सरकारलाई सुझाइरहेका छन्।</p>
<p>तीन दिनअघि प्रधानमन्त्रीसँगको भिडिओ कन्फ्रेन्समा सातवतै प्रदेशका मुख्यमन्त्रीहरूले पनि लकडाउनको समय अझै केहीदिन बढाउनुपर्ने भन्दै प्रधानमन्त्रीको ध्यानाकर्षण गराएका थिए।</p>
<p>सो क्रममा प्रधानमन्त्री ओलीले <a href="https://dekhapadhi.com/news/10309" target="_blank">लकडाउन छिट्टै अन्त्य नहुने र सीमामा कडाइ</a> हुने बताएका थिए।</p>
<p>बालुवाटार स्रोतका अनुसार अझै एकसातासम्म लकडाउनको समय बढ्न सक्ने देखिन्छ।</p>
<p>प्रधानमन्त्रीले केही दिनअघि राष्ट्रका नाममा सम्बोधन गर्दै अब आउने दुईसाता केही चुनौतीपूर्ण हुने बताएका थिए।</p>
<p>कोभिड-१९ फैलिन नदिन सरकारले ११ चैतदेखि पहिलो पटक लकडाउन लागू गरेको थियो। त्यसपछि दुई पटक अवधि बढाएर ३ वैशाखसम्मलाई लकडाउन लम्ब्याउने निर्णय गरिएको हो।</p>
<p>भारतमा पनि लकडाउनको समय आजै सकिदैछ। त्यहाँ प्रधानमन्त्री मोदीले आज राष्ट्रका नाममा सम्बोधन गर्दैछन्।</p>
<p>सम्बोधनमै मोदीले लकडाउन लम्बाउने घोषणा गर्ने भारतीय सञ्चार माध्यमहरुले जनाएका छन्।</p>
<p>भारतमा कोभिड-१९ का बिरामी दिनहुँ थपिरहँदा बेला नेपालमा थप सतर्कता र सावधानी अपनाउनुपर्ने माग बढ्दै गएको छ।</p>
प्रतिक्रिया दिनुहोस्
.jpg)
