दाङमा काेभिड-१९ बारे अफवाह फैलाउने पक्राउ
<p>दाङ। कोभिड-१९ बारे सामाजिक सञ्जालमा अफवाह फैलाउने एकजनालाई प्रहरीले पक्राउ गरेको छ।</p>
<p>दाङमा पनि एकजना कोरोना भाइरस संक्रमित भेटिएको भनेर आज फेसबुकमा स्टाटस राखेको भन्दै घोराही उपमहानगरपालिका-१५ का २८ वर्षीय दीपक न्यौपानेलाई जिल्ला प्रहरी कार्यालय दाङले पक्राउ गरेको हो।</p>
<p>जिल्ला प्रहरी कार्यालय दाङका प्रहरी नायव उपरीक्षक सुमीत खड्काले अनुसन्धान भइरहेकाे बताए।</p>
<p><strong>तरकारी बजार बन्द</strong></p>
<p>भारतबाट तरकारी आयात गरेपछि दाङको तुलसीपुर उपमहानगरपालिकाले सञ्चालनमा ल्याएको तरकारी बजार आज बन्द गरिएको छ।</p>
<p>कोरोना भाइरसको संक्रमणलाई ध्यानमा राख्दै भारतबाट तरकारी आयात नगर्ने निर्णय विपरीत तरकारी फलफूल आयात भएपछि तुलसीपुर-६ स्थित बजार सिल गरिएको तुलसीपुर उद्योग वाणिज्य सङ्घका अध्यक्ष वीरबहादुर रावतले बताए।</p>
<p>प्रत्येक दिन पाँचवटासम्म भारतीय गाडीले तरकारी ल्याउने गरेका कारण कोरोना भाइरस संक्रमणको जोखिम बढेकाले सिल गरेको संघका अध्यक्ष रावतकाे भनाइ छ।</p>
<p>यस्तै भारतीय तरकारी र फलफूल बिक्री गरेको भन्दै सापकोटा तरकारी पसल र मनोज ‘फ्रुट हाउस’का सञ्चालकलाई कारबाही गरिने भएको छ। <em>रासस</em></p>
प्रतिक्रिया दिनुहोस्
.jpg)
