विश्व स्वास्थ्य संगठनलाई दिने सहायता रोक्न अमेरिकी राष्ट्रपतिको निर्देशन
<p>वासिङ्टन। अमेरिकी राष्ट्रपति डोनाल्ड ट्रम्पले विश्‍व स्वास्थ्य संगठनलाई आफ्नो देशले उपलब्ध गराउँदै आएको सहायता रोक्न अमेरिकी प्रशासनलाई निर्देशन दिएका छन्।</p>
<p>अमेरिकाबाट सहायता लिएर संगठनले चीनको पक्ष लिएको र कोरोना भाइरसको संक्रमण रोकथामका लागि ठोस काम गर्न नसकेको आरोप लगाउँदै ट्रम्प केही दिनयता क्रुद्ध थिए।</p>
<p>‘विश्‍व स्वास्थ्य संगठनले उसको आधारभूत जिम्मेवारी वहन गर्न सकेन। यसले आफूलाई विश्‍वसनीय बनाउन सक्नुपर्छ,’ ह्वाइट हाउसमा आयोजित पत्रकार सम्मेलनमा ट्रम्पले भने, ‘चीनको गलत सूचनाले संसारभर कोरोना भाइरसको संक्रमण फैलियो।’</p>
<p>अमेरिका विश्व स्वास्थ्य संगठनको मुख्य दाता हो। स्विजरल्यान्डको जेनेभामा मुख्यालय रहेको संगठनको कुल बजेटको करिब १५ प्रतिशत अमेरिकाले बेहोर्दै आएको छ। सन् २०१९ मा अमेरिकाले ४० करोड डलर सहायता दिएको थियो।</p>
<p>ट्रम्पको उक्त निर्णयको भने चौतर्फी विरोध शुरु भएको छ। अमेरिकन मेडिकल एसोसिएसनका अध्यक्ष डा. प्याट्रिस ह्यारिसले राष्ट्रपतिको निर्णयलाई ‘खतरनाक कदम’को संज्ञा दिए। ‘यसले कोभिड-१९ सँग लडिरहेको संसारलाई गलत दिशामा मोड्नेछ,’ उनले भने, ‘राष्ट्रपति ट्रम्पले यस निर्णयमा पुनर्विचार गर्नुपर्छ।’</p>
प्रतिक्रिया दिनुहोस्
.jpg)
