कोभिड-१९ महामारीका बीच कोरियामा आज निर्वाचन, संक्रमितलाई पनि मतदानको व्यवस्था
<p>काठमाडौं। कोभिड-१९ को माहामारीकै बीच राष्ट्रिय सभाका ३०० सदस्यका लागि दक्षिण कोरियामा आज आम निर्वाचन हुँदैछ।</p>
<p>चारवर्षे कार्यकालका लागि उम्मेद्वार चुन्‍न चार करोड ४० लाख मतदाता मतदान प्रक्रियामा सहभागी हुँदैछन्।</p>
<p>वर्तमान राष्ट्रपति मुन जे इनको पार्टी डोमोक्रेटिक बहुमत ल्याउने योजनासहित मैदानमा छ। हाल सदनमा यो दलको १२० सिट छ।</p>
<p>बलियो प्रतिद्वन्द्वी मानिने युनाइटेड फ्युचर पार्टी पनि आफ्नो बहुमत आउनेमा ढुक्क छ।</p>
<p>सदनमा युटाइटेड फ्युचरको पार्टीको ११२ सिट भए पनि २० सांसद छुट्टै युनाइटेड पार्टी खोलेर चुनावी मैदानमा होमिएका छन्।</p>
<p>उनीहरु पनि आफ्नो बहुमत आउने दाबी गरिरहेका छन् ।</p>
<p>मजदूरको पक्षधर मानिने राष्ट्रपति मुनको तीनवर्षे कार्यकाल पूरा भएको छ।</p>
<p>आफूले सत्ता सम्हाल्नासाथ मजदुरको ज्याला प्रतिघण्टा १० हजार वन पुर्‍याउने उनको महत्वकांक्षी योजना अझै पूरा भएको छैन।</p>
<p>तर, कोरोना माहामारी नियन्त्रणका लागि उनको सरकारले गरेको कदमको विश्वव्यापीरूपमा प्रशंसा भइरहेको छ ।</p>
<p>मुनको पार्टी डेमोक्रेटिकले निर्वाचनमा बहुमत पाए मुनलाई बाँकी दुई वर्ष आफूले चाहेअनुसारका काम गर्न, नीति नियम बनाउन र योजना पूरा गर्ने अवसर हुनेछ ।</p>
<p>कोरियाली निर्वाचन आयोगका अनुसार कोरोना भाइरस संक्रमण फैलन नदिन सुरक्षा व्यवस्था चुस्त बनाइएको छ।</p>
<p>मतदाताले लाइनमा उभिँदा एक मिटर दूरी कायम राख्नुपर्ने, सबैले मास्क लगाउनुपर्ने, मतदान केन्द्र प्रवेश गर्नुअघि स्यानिटाइजर अनिवार्य प्रयोग गर्नुपर्ने छ ।<br />
<br />
हातमा स्यानिटाइजर लगाएपछि निर्वाचन आयोगका प्रतिनिधिले दिएको प्लास्टिकको पञ्जा लगाउनुपर्ने व्यवस्था गरिएको छ।</p>
<p>मतदानस्थलमा सबै मतदाताको विशेष यन्त्रमार्फत ज्वरो नापिने र ३७.५ भन्दा बढी तापक्रम भएका मतदातालाई छुट्टै लाइनको व्यवस्था गरिनेछ ।</p>
<p>चुनावमा कोरोना संक्रमितले पनि मतदान गर्न पाउनेछन्।</p>
<p>उनीहरु बिहान ९ बजेभन्दा अघि र बेलुकी ६ बजेपछि मात्र मतदान केन्द्र जान सक्ने व्यवस्था मिलाइएको छ।</p>
<p>साथै विदेशमा रहेका कोरियाली नागरिकका लागि पनि मतदानको व्यवस्था गरिएको थियो । उनीहरुले दुई साताअघिदेखि नै मतदान गरिसकेका छन्।</p>
<p>माहामारीका कारण कोरियाली सरकारले सभा सम्मेलन तथा भेला गर्न रोक लगाएको थियो।</p>
<p>दुई वा तीन जना प्रतिनिधिहरुले सामान्य घरदैलो कार्यक्रम गरी प्रचारप्रसार तथा सामाजिक सञ्जाल र फोन म्यासेन्जरबाटै प्रचार गरे भने केही ठाउँमा गाडीबाट माइकिङमार्फत् उम्मेद्वारले आफ्नो योजना भने र ब्यानर टाँस्ने काम पनि गरेका थिए ।</p>
<p>चीनको वुहानमा कोभिड-१९ देखिएलगत्तै संक्रमण उच्च भएको मुलुक दक्षिण कोरियाले लकडाउन नगरेरै संक्रमण रोक्न सफलता प्राप्त गरेको भन्दै चर्चा भइरहेको छ। </p>
<p>त्यहाँ हालसम्म १० हजार ५३७ जनाको संक्रमण देखिएको छ भने २१७ ले ज्यान गुमाएका छन्। <em>रासस</em></p>
प्रतिक्रिया दिनुहोस्
.jpg)
