नियमित खोप कार्यक्रम स्थगित हुँदा थप जोखिममा बालबालिका
<p>कैलाली। कोरोना भाइरसको संक्रमण रोक्न सरकारले लागू गरेको लकडाउनका कारण खोप कार्यक्रमसमेत प्रभावित भएका छन्।</p>
<p>सरकारले खोप कार्यक्रम स्थगित गरेसँगै सुदूरपश्‍चिम प्रदेशका हजारौँ बालबालिका नियमित खोपबाट वञ्‍चित भएका छन्।</p>
<p>त्यसका कारण भाइरल रोगहरूसँग लड्ने प्रतिरोधात्मक क्षमता बालबालिकामा कम हुने स्वास्थ्यकर्मीहरूले बताए। गर्भवतीलाई दिइने खोपसमेत बन्द गरिएको छ। भर्खरै जन्मिएको शिशुलाई खोप लगाउन पटक-पटक अस्पताल पुगेका धनगढीका सतीश पाण्डेले जन्मिनेबित्तिकै बच्चालाई लगाउनुपर्ने खोप लगाउन नपाएको बताए।</p>
<p>जन्मिएको १५ महिनासम्म बालबालिकालाई ११ किसिमका खोप लगाउनुपर्छ। बीसीजी खोप जन्मनासाथ लगाइन्छ। यसलाई एक डोज लगाए पुग्छ। यसले क्षयरोगविरुद्ध काम गर्छ। यस्तै, डिपीटी खोप ६, १० र १४ साताको उमेरमा लगाइन्छ। यसले भ्यागुते रोग, लहरे खोकी, धनुष्‍टंकार, हेपाटाइटिस बी, हेमाफिलस बी बाट हुने मेनिन्जाइटिस र निमोनियाबाट जोगाउँछ।</p>
<p>पोलियोको खोप ६, १० र १४ साताको उमेरमा लगाइन्छ। एफआर्इपीभी खोप ६ साता र १४ साताको उमेरमा दिइन्छ। यसले रोटा भाइरसद्वारा हुने पखालाविरुद्ध काम गर्छ।</p>
<p>पीसीभी खोप ६ साता, १० साता र ९ महिनाको उमेरमा दिइन्छ। यस्तै दादुरा, रुबेला, जेई, टीडीलगायत खोप पनि शिशुलाई दिइन्छ। तर अहिले खोप सेवा पूर्ण रूपमा बन्द छ। </p>
<p>सेती प्रादेशिक अस्पतालका सूचना अधिकारी दिलिपकुमार श्रेष्‍ठले अहिले सबै खोप बन्द गरिएको बताए। संघीय सरकारको निर्णयअनुसार खोप कार्यक्रम बन्द भएको उनले जानकारी दिए।</p>
<p>जिल्ला स्वास्थ्य कार्यालय कैलालीका प्रमुख लालबहादुर धामीले कोरोना जोखिम न्यूनीकरणकै लागि खोप कार्यक्रम सञ्‍चालन गर्न नसकिएको बताए। उनले खोप लगाउन खोप केन्द्रमा बालबालिका जम्मा गर्नुपर्ने र सामाजिक दूरीसमेत कायम राख्नुपर्ने भएकाले अहिलेलाई सम्भव नभएको बताए।</p>
प्रतिक्रिया दिनुहोस्
.jpg)
