दिल्लीको निजामुद्दीन मरकजबाट फर्किएका सप्तरीका दुईजनाको र्यापिड टेष्ट पोजेटिभ, थ्रोट स्वाब नमूना जाँच हुँदै
<p>सप्तरी। भारतको दिल्लीस्थित निजामुद्दीन मरकजबाट फर्केका दुई नेपालीको र्‍यापिड डायग्नोष्टिक टेष्ट (आरडिटी) किटबाट कोभिड-१९ परीक्षण गर्दा पोजेटिभ आएको छ।</p>
<p>राजविराजस्थित गजेन्द्रनारायण सिंह अस्पतालमा गएराति द्रुत परीक्षण किटबाट परीक्षण गर्दा उनीहरूको रिपोर्ट पोजेटिभ आएको सिनियर कन्सल्टेन्ट जनरल फिजिसियन डा. रणजित झाले बताए।</p>
<p>तब्लिगी जमातद्वारा आयोजित सभाबाट आएका खडग नगरपालिकाका तीन, सुरुङ्गा नगरपालिका, अग्निसाइर कृष्ण सवरण, विष्णुपुर र तिलाठी कोइलाडी गाउँपालिकाका एक/एक गरी सातजनाको द्रुत परीक्षण गरिएको अस्पतालका प्रमुख मेडिकल सुपरिटेन्डेण्ट डा. चुमनलाल दासले जानकारी दिएका छन्।</p>
<p>तीमध्ये खडग नगरपालिका र तिलाठी कोइलाडी गाउँपालिकाका एक/एक जनाको रिपोर्ट पोजेटिभ आएको अस्पतालले जनाएको छ।</p>
<p>उनीहरूले मरकजमा सहभागी भएर फर्किएको ३२ दिन बितेको बताए पनि स्थानीयवासी भने ११ चैतमा घर फर्किएको बताउँछन्। उनीहरु घरमै बसिरहेका थिए।</p>
<p>र्‍यापिड टेष्टमा रिपोर्ट पोजिटिभ आएपछि दुईजनालाई राजविराजस्थित गजेन्द्रनारायण सिंह अस्पतालमा आइसोलेसनमा राखिएको छ।</p>
<p>अन्य पाँच जनालाई खडग नगरपालिकास्थित क्वारेन्टाइनमा पठाएको अस्पतालले जनाएको छ।</p>
<p>अस्पतालले सातजनाकै स्वाब परीक्षणका लागि राति नै धरानस्थित बिपी कोइराला स्वास्थ्य विज्ञान प्रतिष्ठान, धरान पठाएको छ। <em>रासस</em></p>
प्रतिक्रिया दिनुहोस्
.jpg)
