सहायता रोक्ने ट्रम्पको निर्णयप्रति डब्लूएचओद्वारा खेद व्यक्त
<p>जेनेभा। अमेरिको दिँदै आएको सहायता रोक्ने राष्‍ट्रपति डोनाल्ड ट्रम्पको निर्णयप्रति विश्‍व स्वास्थ्य संगठन (डब्लूएचओ)ले खेद व्यक्त गरेको छ।</p>
<p>‘राष्‍ट्रपति ट्रम्पको निर्णयप्रति हामीलाई खेद छ,’ डब्लूएचओका महानिर्देशक डा. टेड्रोस अदानम गेब्रेयेससले भने। राष्‍ट्रपति ट्रम्पले मंगलबार डब्लूएचओलाई दिइँदै आएको सहायता बन्द गर्न आफ्नो प्रशासनलाई निर्देशन दिएका थिए। कोभिड-१९ विरुद्धको लडाईंमा डब्लूएचओको व्यवस्थापन खराब देखिएको ट्रम्पको आरोप थियो।</p>
<p>एक सय ९४ वटा सदस्यमध्ये अमेरिका डब्लूएचओको सबैभन्दा ठूलो दाता हो। अमेरिकाले कुल सहायताको करिब १४ प्रतिशत बेहोर्दै आएको छ। </p>
<p>‘वीफोरम डट ओआरजी’का अनुसार चीनको वुहानमा फरक खालको निमोनियाको संक्रमण देखिनासाथ आफूहरू तत्काल कोरोना भाइरसविरुद्धको ‘एक्सन’मा उत्रिएको महानिर्देशक गेब्रेयेससको भनाइ थियो। १० जनवरीभित्रै डब्लूएचओले रोगबाट बच्न प्राविधिक मार्गनिर्देशन सार्वजनिक गरिसकेको उनले बताए।</p>
<p>संसारभरका स्वास्थ्यकर्मीहरूलाई अनलाइन तालिम कोर्स, ९० भन्दा बढी मुलुकमा क्लिनिकल ट्रयाकल र व्यक्तिगत सुरक्षा सामग्री (पीपीई) संसारभर पुर्‍याउन डब्लूएचओले काम गरिरहेको उनको भनाइ थियो।</p>
<p>कोभिड-१९ मात्र नभई पोलियो, मलेरिया, दादुरा, इबोला, एचआईभी, क्षयरोग, कुपोषणलगायत दर्जनौं रोगविरुद्ध डब्लूएचओ सक्रिय रहेको महानिर्देशक गेब्रेयेससले बताए।</p>
प्रतिक्रिया दिनुहोस्
.jpg)
