शिक्षण अस्पतालका चिकित्सक प्रहरीबाट कुटिएको घटनाको छानबिन शुरू
<p>काठमाडौं। त्रिवि शिक्षण अस्पताल महाराजगञ्जमा कार्यरत् तीनजना चिकित्सक प्रहरीबाट कुटिएको विषयमा महानगरीय प्रहरी कार्यालय रानीपोखरीले छानबिन शुरू गरेको छ।</p>
<p>प्रहरी बरिष्ठ उपरीक्षक (एसएसपी) किरण बज्राचार्यको नेतृत्वमा छानबिन समिति बनाएर अनुसन्धान थालेको रानीपोखरीका प्रमुख डीआईजी विश्वराज पोखरेलले जानकारी दिए।</p>
<p>तीन सदस्यीय छानबिन समितिमा अपराध महाशाखाका एसपी मुकेश सिंह र महानगरीय प्रहरी परिसर काठमाडौंका डीएसपी होविन्द्र बोगटी सदस्य रहेका छन्।</p>
<p>“कार्यालयले छानबिन अघि बढाइसकेको छ। समिति बनाएका छौं।”, उनले भने, “घटना के भएको हो त्यसको सत्यतथ्य बुझेर प्रतिवेदन दिन भनिएको छ।”</p>
<p>डिआइजी पोखरेले अनुसन्धानपछि घटनामा दोषी ठहरिएका प्रहरी कर्मचारीलाई कारवाही गरिने बताएका छन्।</p>
<p>हिजो, ३ वैशाख बेलुका अस्पतालबाट ड्युटी सकेर फर्कने क्रममा महानगरीय प्रहरी वृत्त महाराजगञ्जबाट खटिएका प्रहरीले तीनजना चिकित्सकलाई लाठी प्रहार गरेको चिकित्सकले आरोप लगाएका छन्।</p>
<p>राष्ट्रिय आवासीय चिकित्सक संघले विज्ञप्ति निकालेर हातपात र लाठी प्रहार गर्ने प्रहरीमाथि कारवाहीको माग गरेको छ।</p>
प्रतिक्रिया दिनुहोस्
.jpg)
