मालवाहक सवारी चल्न नदिने वडाको निर्णयसँगै मेलम्ची खानेपानी आयोजनाको काम प्रभावित
<p>सिन्धुपाल्चोक। लकडाउनका बीचमा पनि जारी राष्ट्रिय गौरवको मेलम्ची खानेपानी आयोजनाको निर्माण कार्य फेरि प्रभावित भएको छ।</p>
<p>दिनहुँ निर्माण समग्री बोकेर मालबाहक सवारीसाधनको ओहोरदोहोर बढेको भन्दै खाद्यान्न र एम्बुलेन्सबाहेकका सवारी चल्न नदिने हेलम्बु गाउँपालिका-४ नम्बर वडा कार्यालयको निर्णयसँगै आयोजनाको निर्माण निरन्तरता अन्यौल देखिएको हो।</p>
<p>वडाअध्यक्ष राजकुमार लामिछानेको अध्यक्षतामा हिजो, ३ वैशाखमा बसेको वार्ड समितिको बैठकले आयोजनास्थल अम्बाथानको मुख्य नाका रहेको वडाबाट अत्यावश्यकबाहेकका सवारीसाधन संचालनमा रोक लगाउने निर्णय गरेको छ।</p>
<p>आयोजनाका साइट इन्जिनियर शेखर खनालका अनुसार आयोजनास्थलमा ढलानको लागि सिमेन्ट सकिएको बताए। उनका अनुसार बालुवा र गिट्टी पनि साता दिन जतिलाई मात्र पुग्‍ने मौज्दात छ।</p>
<p><img alt="" height="676" src="https://www.dekhapadhi.com/storage/photos/shares/COVID-19/melanchi mirman 3.jpg" width="960" /></p>
<p>"सकभर निर्माणको काम जारी राख्ने सोचमा छौँ। रडहरू बाँध्‍ने काम भइरहेको छ। केही दिन ढुंगा/गिट्टी बालुवालगायतका स्थानीय सामग्री भने ल्याउँदैनौ", खनालले <em>देखापढी</em>सँग भने।</p>
<p>मालवाहक सवारी साधन रोक्ने वडाको निर्णयबारे अहिलेसम्म कसैले आधिकारिक जानकारी नगराएको उनले बताएका छन्।</p>
<p>मेलम्चीमा हाल हेडवर्क्समा ढलान गर्ने, रड काट्ने, टनेलभित्र ड्रिलिङ गर्ने, भुइँ ढलान गर्ने लगायतका काम भइरहेको थियो।</p>
<p>अम्बाथान साइटमा सबै गरी १२० जनाको हाराहारीमा रहेका छन्। ६५ जना मजदुर, मेकानिक र ड्राइभर गरी २० जना , ८ जना सिभिल इन्जिनियर तथा ठेकेदार कम्पनी सिनो हाइड्रोका प्रोजेक्ट म्यानेजर वाङ वेइसहित ३१ जना चिनियाँ साइटभित्रै रहेर काम गर्दै आएका छन्।</p>
<p>तर, मालवाहक सवारीसाधनमा वडा कार्यालयले लगाएको रोक र गिट्टी-बालुवा नल्याउने आयोजनाको निर्णयले मेलम्चीको पानी सुन्दरीजलमा पुर्‍याउने आउँदो असारको 'डेडलाईन' पुन: धकेलिने भएको छ।</p>
<p>कोरोना रोकथाम तथा नियन्त्रण उच्चस्तरीय समितिको २० चैतमा बसेको सोह्रौं बैठकले तामाकोशी, मेलम्ची जस्ता ठूला आयोजनाको कामलाई निरन्तरता दिने वातावरण बनाउने निर्णय गरेको थियो।</p>
<p>१६ मार्चमा जारी आयोजनाको प्रगति विवरण अनुसार यही असारभित्रमा मेलम्चीको पानी सुन्दरीजल पुर्‍याउने लक्ष्य छ।</p>
<p>आयोजनास्थलमा रहेका साइट इन्जिनियर खनालका अनुसार मोटामोटी हेडवर्क्सको काम ५० प्रतिशत र टनेलको करीब ३० प्रतिशत काम बाँकी छ।</p>
<p>यो आयोजनाबाट शुरूमा दैनिक १७ करोड लिटर खानेपानी काठमाडौं ल्याउने तयारी छ।</p>
<p><img alt="" height="682" src="https://www.dekhapadhi.com/storage/photos/shares/COVID-19/melanchi mirman 2.jpg" width="960" /></p>
प्रतिक्रिया दिनुहोस्
.jpg)
