चीनले भारतलाई पठायो साढे ६ लाख कोभिड–१९ परीक्षण किट
<p>नयाँदिल्ली । चीनले भारतलाई कोभिड–१९ का बिरामीको तत्काल पहिचान र आइसोलेसनका लागि साढे ६ लाख थान कोरोना भाइरस परीक्षण उपकरण पठाएको छ । </p>
<p>यो सिपमेन्ट आगामी १५ दिनमा चीनबाट आउने २० लाख थान उपकरणको एक हिस्सा हो । यसमा र्‍यापिड एन्टिबडी परीक्षण किट्स सामेल छन् ।</p>
<p>चीनका लागि भारतीय राजदूत विक्रम मिश्रीले बिहीबार ट्विट गर्दै भनेका छन्, ‘६ लाख ५० हजार र्‍यापिड एन्टिबडी किट्स र आरएनए एक्सट्रयाक्सन किट्स गोन्जाओ विमानस्थलबाट तत्काल पठाइँदैछ ।’</p>
<p>एनडीटीभीका अनुसार कोभिड–१९ का बिरामीको बढ्दो दरसँगै भारत सरकारले परीक्षण उपकरण र व्यक्तिगत सुरक्षा सामग्री (पीपीई)को अभाव झेल्दै आएको छ । साथमा भेन्टिलेटरको आवश्यकता पनि उत्तिकै देखिएको छ ।</p>
<p>महामारीको उद्गम थलो चीन अहिले यस्ता सामग्रीको मुख्य आपूर्तिकर्ता बनेको छ । अमेरिकालगायत विकसित मुलुक पनि यी सामग्रीमा चीनसँगै निर्भर छन् ।</p>
<p>भारतमा १२ हजार भन्दा बढीमा संक्रमण र चार सय १४ जनाको मृत्यु भइसकेको छ । चीनले मेडिकल सामग्रीका दुई मुख्य कन्साइन्मेन्ट पठाउँदैछ ।</p>
<p>चीनले यसअघि पूर्वोत्तर राज्य आसामलाई ५० हजार पीपीई पठाइसकेको छ । गोन्जाओबाट उडेको डार्ट कार्गो विमान सीधै गुवाहाटी विमानस्थलमा उत्रिएको थियो । </p>
<p>यस साताको शुरुमै भारतीय राजदूत मिश्रीले चीनमा १५ लाख थान पीपीई अर्डर गरिएको जानकारी दिएका थिए ।<br />
</p>
प्रतिक्रिया दिनुहोस्
.jpg)
