बेरोजगारी भत्ताका लागि अमेरिकामा २ करोड २० लाखको आवेदन
<p>न्युयोर्क। कोरोना भाइरस संक्रमण शुरु भएयता अमेरिकामा व्यावसायिक गतिविधि ठप्प रहेकाले बेरोजगारी दर ह्वात्तै बढेको छ। हालसम्म दुई करोड २० लाख अमेरिकीले बेरोजगारी भत्ताका लागि आवेदन दिएका छन्।</p>
<p>यो आँकडा अमेरिकाको कुल वर्क फोर्सको करिब १३ दशमलव पाँच प्रतिशत हो। पछिल्लो साता मात्र त्यसरी आवेदन दिनेहरूको संख्या करिब ५२ लाख छ।</p>
<p>बेरोजगारीको यो दर सन् १९६७ यताको सबैभन्दा ठूलो रहेको श्‍रम विभागले जनाएको छ। कोरोना भाइरसको संक्रमण फैलिन नदिन राज्यहरूले धमाधम व्यावसायिक प्रतिष्‍ठान बन्द गराएपछि बेरोजगारी दर उकालो लागेको हो।</p>
<p>मार्च महिनामा अमेरिकाको बेरोजगारी दर चार दशमलव चार प्रतिशत पुगेको थियो। जबकि, फेब्रुअरीमा त्यो दर ती दशमलव पाँच प्रतिशत मात्र थियो। अप्रिलमा दोहोरो अंकको वृद्धिमा पुगेको छ, बेरोजगारी।</p>
<p>कतिपय अर्थशास्त्रीले बेरोजगारीको यो अवस्था अल्पकालीन रहेको बताएका छन्। तथापि, कोरोना भाइरसको संक्रमण हटेपछि मात्र रोजगारीको दर बढ्न थाल्ने निश्‍चित छ।</p>
<p>राज्यहरूका श्‍रम विभागले प्राविधिक जनशक्ति भर्ना लिएर बेरोजगारी लाभका लागि परेका आवेदनमा कारवाही अगाडि बढाएका छन्। छिट्टै केही राज्यले बेरोजगारी लाभ वितरण पनि थाल्ने छन्।</p>
<p>न्युयोर्कजस्ता कोभिड-१९ को चपेटामा रहेका ६ वटा राज्यले केवल १० साताको मात्र बेरोजगारी भत्ता बेहोर्न सक्ने सम्भावना छ। बाँकी रकमका लागि संघीय सरकारको मुख ताक्नु पर्नेछ। कर फाउन्डेसनको तथ्यांकबाट ती राज्यहरूको आम्दानीको स्रोत खुलेको हो।</p>
प्रतिक्रिया दिनुहोस्
.jpg)
