लकडाउन पालना गराउने क्रममा नाइजेरियामा झडप, १८ व्यक्तिको मृत्यु
<p>नाइजेरिया। कोरोना भाइरस संक्रमण फैलिन रोक्न सरकारद्वारा घोषणा गरेको लकडाउनको पालना गराउने क्रममा यहाँका विभिन्न राज्यमा झडप हुँदा कम्तीमा १८ नागरिकको मृत्यु भएको यहाँको मानव अधिकारवादी समूहले बताएको छ।</p>
<p>नाइजेरियाको ठूलो शहर लागोस र अबुजामा पूर्णरूपमा लकडाउन भएको छ भने अन्य केही राज्य र शहरमा अत्यावश्यक सेवाबाहेक घरबाहिर ननिस्कन प्रशासनले नागरिकसँग आग्रह गरेको छ।</p>
<p>संक्रमण फैलिन नदिन घोषणा गरिएको लकडाउनको पालना गराउन प्रशासनले प्रहरी तथा सेनासमेतलाई परिचालन गरेको छ।</p>
<p>मानव अधिकारवादी समूहले भनेको छ, “नाइजेरियामा बन्दाबन्दीको पालना गराउने क्रममा देशका विभिन्न राज्यमा झडपका कारण मृत्यु हुनेको संख्या अहिलेसम्म संक्रमणका कारण मृत्यु भएका व्यक्तिको संख्याभन्दा बढी छ।”</p>
<p>अत्यधिक जनघनत्व रहेको अफ्रिकी मुलुक नाइजेरियामा आजसम्म ४०७ व्यक्तिमा कोरोना भाइरस संक्रमणको पुष्टि भएको छ भने संक्रमणका कारण मृत्यु हुनेको संख्या १२ पुगेको छ।</p>
<p>नाइजेरियाली राष्ट्रिय मानव अधिकार आयोगले स्थानीय समयअनुसार गयरातिसम्ममा आफ्नो कार्यालयमा मानव अधिकार उल्लङ्घनका १०५ घटना दर्ता गराइएको छ र ती अधिकांश घटनामा सुरक्षाकर्मीबाट अनावश्यक बल प्रयोग गरिएको दाबी गरिएको छ।</p>
<p>“मुद्दामध्ये विभिन्न आठस्थानमा सुरक्षाकर्मीले अत्यधिक बल प्रयोग गरेकोले १८ जनाको मृत्यु भएको हो”, आयोगले भनेको छ। आयोगले मृत्यु संख्या सार्वजनिक भएभन्दा धेरै हुन सक्ने देखिएको उल्लेख गरेको छ। <em>- रासस/एएफपी</em></p>
प्रतिक्रिया दिनुहोस्
.jpg)
