सप्तरीमा खाद्यान्न भन्दै मदिरा ओसार्ने पक्राउ
<p>सप्तरी। लकडाउन र सीमा नाका बन्द गरेर देश कोरोना महामारीविरुद्ध लडिरहेका बेला सप्तरीमा भने लागुऔषध र मदिरा कारोबारी सक्रिय भएका छन्।</p>
<p>अत्यावश्यक वस्तुका नाममा प्रदेश २–०१–००१ त ०५२८ नम्बरको ट्र्याक्टरमा मदिरा ओसार्ने महादेवा गाउँपालिका–१ का ३२ वर्षीय श्रवण मण्डल आज राजविराज नगरपालिका–६ बाट पक्राउ परेका छन्।</p>
<p>अत्यावश्यक खाद्यान्न भन्दै मदिरा ओसारिरहेको फेला परेपछि मण्डललाई पक्राउ गरी ट्र्याक्टर र मदिरा बरामद् गरिएको जिल्ला प्रहरी कार्यालयका प्रहरी नायव उपरीक्षक तिलक भारतीले बताए। </p>
<p>“चालक मण्डलसँग मदिराको बिल भर्पाई पनि थिएन, लकडाउनको उल्लंघन गर्दै खाद्यान्न सामग्री भनेर खोल्दा विभिन्न ब्राण्डका मदिरा भेटियो ”, उनले भने।</p>
<p>ट्र्याक्टरमा ९० कार्टुन दिलवाले नामक मदिरा, २० कार्टुन एम्बिसन नामक मदिरा र ६ कार्टुन गोल्डहली नामक मदिरा फेला पारी बरामद् गरिएको उनकाे भनाइ छ। </p>
<p>यस्तै २ वैशाखमा सीमानाका बोदे बरर्साइन नगरपालिका–९ स्थित स्वर्णपट्टिबाट लागुऔषधसहित खड्क नगरपालिका–९ का १९ वर्षीय मो आदिजलाई प्रहरीले पक्राउ गरेको थियो।</p>
<p>भारतीय बजार लौकहीबाट लागुऔषध खरिद गरेर ल्याउँदै गरेका आदिजका साथबाट कोरेक्स तीन बोतल र नाइट्रोभेट ट्याब्लेट ३० थान बरामद् भएको सशस्त्र प्रहरी बल, नेपाल बोर्डर आउट पोष्ट सुभरनपट्टिका प्रमुख हिमाल केसीले जानकारी दिए। <em>रासस</em></p>
प्रतिक्रिया दिनुहोस्
.jpg)
