प्रधानमन्त्रीलाई कांग्रेस नेताकाे पत्रः स्वदेश आउन चाहने नेपालीलाई ल्याइयाेस्
<p>काठमाडाैं। नेपाली कांग्रेसले विदेशमा अलपत्र परेका स्वदेश आउन चाहने नेपालीलाई तत्काल आवश्यक प्रक्रिया पूरा गरी नेपाल ल्याउने प्रबन्ध गर्न सरकारसँग आग्रह गरेको छ।</p>
<p>कांग्रेस केन्द्रीय सदस्य एवं जनसम्पर्क समन्वय विभाग प्रमुख गोविन्द भट्टराईले आज प्रधानमन्त्री केपी शर्मा ओलीलाई पत्र लेख्दै रोजगारी, अध्ययन वा अन्य कुनै पनि काममा विश्वका जुनसुकै मुलुकमा गएका नेपालीको स्वास्थ्यबारे सरकारले चासो लिएर उनीहरूको हितमा आवश्यक कदम चाल्न आग्रह गरेका हुन्।</p>
<p>उनले कोरोना भाइरस संक्रमणका कारण विश्व अर्थतन्त्रमै गम्भीर समस्या उत्पन्न भएको अवस्थामा विभिन्न देशमा रहेका नेपाली जो नेपाल आउन चाहन्छन्, उनीहरूलाई तत्काल कूटनीतिक पहल गरी नेपाल ल्याउने व्यवस्था गर्न आग्रह गरेका हुन्।</p>
<p>“विदेशमा रहेका नेपालीलाई फिर्ता ल्याएपछि उनीहरूलाई कम्तीमा पनि २१ दिनसम्म क्वारेन्टाइनमा राख्ने प्रबन्ध तत्काल गर्न आवश्यक छ, होटल व्यवसायी, स्कुल र कलेज सञ्चालकले आफ्नो भवन सरकारले चाहेमा क्वारेन्टाइनका रूपमा प्रयोग गर्न दिने भनेका छन्, सरकारले तत्काल काठमाडौंलगायतका अन्य क्षेत्रका होटल, स्कुल र कलेजलाई आवश्यकताअनुसार क्वारेन्टाइन बनाओस्, जसले विदेशबाट आएका नेपालीलाई निश्चित समयसम्म क्वारेन्टाइनमा सुरक्षितरूपमा राख्न सकियोस्”, पत्रमा उल्लेख छ।</p>
<p>नेता भट्टराईले नेपाल प्रवेशका लागि सिमानासम्म पुगेका नेपाली नागरिकलाई नेपालभित्र क्वारेन्टाइन बनाएर राख्नुपर्ने र विदेशमा रहेका केही नेपालीको प्रवेशाज्ञाको समस्याका सन्दर्भमा त्यस्ता नेपालीलाई नेपाल ल्याउने वा निश्चित समयका लागि प्रवेशाज्ञा थप्न तत्काल कूटनीतिक पहल गर्नुपर्ने आग्रह गरे।</p>
<p>साथै आवश्यक स्वास्थ्य सामग्री तत्काल खरिद गरी कोरोना भाइरसविरुद्धको तयारी चुस्त बनाउन, स्वास्थ्य सामग्रीको गुणस्तरमा अन्तर्राष्ट्रिय मापदण्ड पूरा गरेर मात्रै खरिद गर्ने गरी मापदण्ड बनाउन आग्रह गरिएको छ।</p>
<p>यसैगरी महाव्याधी लम्बिँदै गयो भने वैदेशिक रोजगारीमा जाने नेपालीको रोजगारी गुम्ने खतरा रहेको उल्लेख गर्दै त्यसको पूर्वतयारीस्वरूप सरकारले अहिले नै उनीहरूका लागि रोजगारीको विशेष कार्यक्रमको तयारी शुरू गर्न आवश्यक रहेको पत्रमा उल्लेख छ। <em>रासस</em></p>
प्रतिक्रिया दिनुहोस्
.jpg)
