पाकिस्तानलाई एक अर्ब ३० करोड डलर आपतकालीन सहायता दिने आईएमएफको निर्णय
<p>काठमाडौं। अन्तर्राष्ट्रिय मुद्रा कोष (आईएमएफ) ले कोभिड–१९ का कारण सिर्जना भएको आर्थिक प्रभावलाई सम्बोधन गर्न पाकिस्तानलाई एक अर्ब ३० करोड अमेरिकी डलर बराबरको आपतकालीन सहायता अनुमोदन गरेको छ।</p>
<p>कोषद्वारा जारी विज्ञप्तिमा महामारीको प्रकोपका कारण सिर्जित भुक्तानी सन्तुलनको समस्या हटाउन कोषको कार्यकारी बोर्डले पाकिस्तानलाई आर्थिक सहायता प्रदान गर्ने निर्णय गरेको उल्लेख छ।</p>
<p>कोभिड-१९ बाट पाकिस्तानको अर्थतन्त्र चालू आर्थिक वर्षमा १.५ प्रतिशतले संकुचित हुनसक्ने अनुमान गरिएको छ ।</p>
<p>कोषको विज्ञप्तिमा भनिएको छ, “कोभिड-१९ को महामारीले पाकिस्तानी अर्थव्यवस्थामा ठूलै असर सिर्जना गर्दैछ। विश्वव्यापी मन्दीको साथसाथै पाकिस्तान सरकारले अवलम्बन गरेका रोकथामका उपायहरूले अर्थतन्त्रको वृद्धिमा गम्भीर दूस्परिणाम निम्त्याएको र बाह्य भुक्तानी सन्तुलनमा तनावको वातावरण सिर्जना गरेको छ। यसले भुक्तानीको सन्तुलनका लागि तत्काल आर्थिक सहायता जरुरी भएको देखिएको छ ।”</p>
<p>कोविड-१९ महामारी आउनुअघि नै पाकिस्तान सरकारले कोषसँग भुक्तानी सन्तुलनमा सिर्जित समस्या सुल्झाउन ठूलो आर्थिक सहायताको माग गरेको थियो।</p>
<p>पाकिस्तानमा कोरोनाभाइरस संक्रमितको संख्या ७ हजारभन्दा बढी भइसकेको छ भने १३४ जनाको ज्यान गएको छ ।</p>
<p>पाकिस्तान सरकारले १२ खर्ब पाकिस्तानी रूपैयाँको एक राहत प्याकेज २४ मार्चमा घोषणा गरेको छ। <em>रासस</em></p>
प्रतिक्रिया दिनुहोस्
.jpg)
