लिड्स युनाइटेड लिजेन्ड हन्टरको कोभिड-१९ का कारण निधन
<p>काठमाडौं। लिड्स युनाइटेडका महान खेलाडी नोर्मन हन्टरको कोरोना भाइरस संक्रमणका कारण ७६ वर्ष उमेरमा आज निधन भएको छ।</p>
<p>लिड्स युनाइटेडको सफल युगमा हन्टर टीमका महत्त्वपूर्ण खेलाडी थिए। सेन्टर ब्याक हन्टरलाई ट्याकलका माहिर मानिन्थे।</p>
<p>लिड्स युनाइटेडको १४ वर्षे करिअरमा उनले दुई लिग उपाधि जितेका थिए। उनी इङ्ल्यान्डले १९६६ मा विश्वकप जित्दा पनि टीम सदस्य थिए।</p>
<p>कोरोना भाइरस संक्रमण पोजिटिभ देखिएपछि उनी १० अप्रिलबाट अस्पताल भर्ना भएका थिए। लिड्स युनाइटेडले उनको निधनले क्लब परिवारमा ठूलो खाडल पैदा भएको बताएको छ।</p>
<p>‘‘उनको लिगेसीलाई कहिल्यौ बिर्सन सकिँदैन। यो दुखद् घडीमा हामी उनको परिवार र आफन्तको साथमा छौं’’, क्लबले जारी गरेको विज्ञप्तिमा भनिएको छ।</p>
<p>हन्टर १५ वर्षको उमेरमा लिड्स युनाइटेडमा अनुबन्ध भएका थिए। उनले लिड्स युनाइटेडबाट सबैखाले प्रतियोगितामा गरेर ७२६ खेल खेलका थिए, जुन क्लब इतिहासकै चाैथो धेरै खेल हो।</p>
<p>१९७६ मा लिड्स युनाइटेड छाडेपछि उनले ब्रिस्टोल सिटी र ब्रान्सलेबाट पनि खेले। खेल करिअरबाट सन्यास लिएपछि उनले टेकेस र रोथरह्याममा प्रशिक्षण पनि दिए। हन्टरले इङ्ल्यान्डको लागि २८ खेल खेलेका छन्।</p>
प्रतिक्रिया दिनुहोस्
.jpg)
