कोरोना संक्रमित उदयपुरका १२ जना अस्पताल भर्ना, थप परीक्षणको योजना बनाउन गाइघाटमा बैठक बस्दै
<p>काठमाडौं। हिजो, ५ वैशाखमा कोभिड-१९ देखिएका उदयपुरका १२ जनालाई विराटनगरस्थित कोशी अस्पतालको कोरोना विशेष अस्पताल भर्ना गरिएको छ।</p>
<p>उनीहरूलाई राति १२ बजे अस्पतालको आइसोलेसन कक्षमा भर्ना गरिएको प्रदेश १ मुख्यमन्त्री कार्यालय कोरोना सूचना केन्द्रले जनाएको छ।</p>
<p>त्रियुगा नगरपालिका-३ भुल्केस्थित मस्जिदमा रहेका भारतीय र केही नेपालीहरूसमेत १२ जनामा हिजो कोरोना भाइरस संक्रमण पुष्‍टि भएको थियो।</p>
<p>३४, २९, २६, २२, २५, २०, ४०, २९ र चारजना २८ वर्षीय पुरुषमा कोभिड-१९ देखिएको स्वास्थ्य मन्त्रालयले जनाएको छ।</p>
<p>टेकुस्थित राष्‍ट्रिय जनस्वास्थ्य प्रयोगशालामा पठाइएको थ्रोट स्वाबको नमूना पोजिटिभ देखिएको सूचना पुगेपछि गएराति ४ वटा एम्बुलेन्सबाट उनीहरूलाई विराटनगर लगिएको हो।</p>
<p><img alt="" height="720" src="https://www.dekhapadhi.com/storage/photos/shares/COVID-19/photo ambulance udayapur.jpg" width="960" /></p>
<p>मस्जिदमा रहेका अन्य चारजनालाई पनि एम्बुलेन्सबाट चिकित्सकको निगरानी र थप परीक्षणको लागि विराटनगर पुर्‍याइएको छ।</p>
<p>राति ११ बजेर ४५ मिनेटमा अस्पताल पुर्‍याइएका उनीहरूलाई अस्पतालले आवश्यक प्रक्रिया पुर्‍याएर मध्यरात १२ बजे भर्ना गरेको छ।</p>
<p>नेपाल पत्रकार महासंघ उदयपुरका अध्यक्ष भरत खड्काले प्रहरीले संक्रमित फेला परेको भुल्के र आसपासको क्षेत्रलाई सिल गरेर आवतजावत ठप्प पारेको जानकारी दिए।</p>
<p>स्वास्थ्य कार्यालय उदयपुरका प्रमुख मोहन सुवेदीका अनुसार संक्रमितको प्रत्यक्ष सम्पर्कमा रहेका व्यक्तिहरूको पहिचान गरी परीक्षणको दायरा बढाउने र अबको योजना तय गर्न बिहान ८ बजे जिल्ला प्रशासन कार्यालयमा बैठक डाकिएको छ।</p>
<p>"मैले प्रदेश सरकारसँग समन्वय गरिरहेको छु। विराटनगरबाट परीक्षणको लागि आवश्यक उपकरणसहित प्राविधिक टोली पठाउने कुरा भएको छ। बैठकबाट रणनीति तय गर्नेछौं", सुवेदीले <em>देखापढी</em>सँग भने।</p>
<p> </p>
प्रतिक्रिया दिनुहोस्
.jpg)
