जुम्लामा थुनुवा र प्रहरीको काेभिड-१९ परीक्षण, रिपोर्ट नेगेटिभ
<p>जुम्ला। जिल्ला प्रहरी कार्यालय जुम्लाको हिरासतमा रहेका थुनुवा र त्यहाँ कार्यरत प्रहरीको काेभिड-१९ परीक्षण गरिएकाे छ।</p>
<p>जिल्ला जनस्वास्थ्य सेवा कार्यालयको चिकित्सक टोलीले र्‍यापिड डायग्नाेस्टिक टेस्ट (आरडीटी) गरेकाे हाे।</p>
<p>तीन थुनुवा र चार प्रहरीको सो जाँच गर्दा सबैजनाको रिपोर्ट नेगेटिभ आएको जनस्वास्थ्य प्रमुख कृष्णप्रसाद सापकोटाले जानकारी दिए।</p>
<p>“त्यसैगरी क्वारेन्टाइनमा बसेका हिमा गाउँपालिकाका दुईजना र तिला गाउँपालिका दुईजना स्वास्थ्यकर्मीको पनि काेभिड-१९ परीक्षण गरिएकाे थियाे। उनीहरूको पनि रिपोर्ट नेगेटिभ आयो”, उनले भने।</p>
<p>प्रहरी नायव उपरीक्षक लालबहादुर धामीले बाहिर ड्युटीमा खटिने प्रहरीको अवस्था के छ भनेर सो जाँच गरिएको जानकारी दिए। “सबैजनाको रिपोर्ट नेगेटिभ देखिएकाे छ। अहिले सबै प्रहरी सुरक्षित नै छौं”, उनले भने।</p>
<p>यसअघि रारालिही प्रहरी चौकीका प्रहरी सहायक निरीक्षककाे पनि आरडीटी गरिएको थियो। उनको पनि रिपोर्ट नेगेटिभ नै आएको जनस्वास्थ्य प्रमुख सापकोटाले जानकारी दिए। <em>रासस</em></p>
प्रतिक्रिया दिनुहोस्
.jpg)
