Others

गृहपृष्ठ

स्वास्थ्य वैज्ञानिक भन्छन्- ‘कोभिड-१९ को खाेप पत्ता नलागे टोकियो ओलम्पिकको सम्भावना न्यून’ काठमाडौं। विश्वका स्वास्थ्य वैज्ञानिकहरूले कोरोना भाइरसको खोप नबन्दासम्म अर्को वर्षका लागि तय भएको टोकियो ओलम्पिक र पारा ओलम्पिक आयोजना ‘असम्भव जस्तै’ रहेको बताएका छन्। प्राध्यापक देवी श्रीधरले प्रभावकारी र सस्तो उपचार विधिको विकास भए एक वर्ष ढिला गरी मिति तोकिएको ओलम्पिक आयोजनाका लागि ‘गेम चेन्जर’ हुन सक्ने बताए। यसै साता बसेको अन्तर्राष्ट्रिय ओलम्पिक कमिटी र टोकियो २०२० आयोजक कार्यसमितीको बैठकले एक वर्षपछि हुने प्रतियोगिता ‘कालो सुरूङको अन्त्यमा उज्यालो’ हुने आशा दोहाेर्&zwj;याएको छ। यद्यपि आईओसीका समन्वय आयोगका अध्यक्ष जोन कोट्सले कोभिड-१९ महामारीले परिवर्तित मितिको ओलम्पिकलाई पनि असर गर्ने सक्ने तथ्यलाई स्वीकार गरेका छन्। ओलम्पिकको नयाँ मिति २०२१ को २३ जुलाईदेखि ८ अगष्टसम्मका लागि निर्धारण गरिएको छ। ४ वैशाखमा पत्रकार सम्मेलनमा बोल्दै उनले आईओसी विश्व स्वास्थ्य संगठनबाट निर्देशित हुने र ठूलो संख्यामा जनभेला हुने वा खेलाडीको परीक्षण गर्नुपर्ने कुराले प्रतियोगितामा असर पर्न सक्ने बताएका थिए। एडिनबर्ग विश्वविद्यालयका प्राध्यापक श्रीधरले टोकियो २०२० योजनाअनुसार हुने सम्भावना ‘खोपमा निर्भर हुने’ बताएका छन्। ‘‘हामी वैज्ञानिकहरूले हेर्दा यो सम्भव छ। मलाई विश्वास छ, एक वा डेढ वर्षमा खोप पत्ता लाग्नेछ। तर, हामी अझै चाँडो गर्ने प्रयास गरिरहेका छौं’’, श्रीधरले भने, ‘‘हामीले अर्को वर्षभित्र खोप पत्ता लगायौं भने ओलम्पिकको सम्भावना बढी हुन्छ। खोप गेम चेन्जर बन्न सक्छ। त्यो प्रभावकारी, सस्तो र सर्वसुलभ हुनुपर्छ। यदि त्यस्तो भएन भने प्रतियोगिता आयोजना कठिन बन्नेछ।’’ कोरोना भाइरस संक्रमणको बढ्दो जोखिमका कारण जापानमा ६ मेसम्मका लागि राष्ट्रिय संकटको घोषणा गरिएको छ। टोकियो २०२० ओलम्पिक आयोजक कमिटीका अध्यक्ष योशिरो मुरीले नयाँ मितिमा प्रतियोगिता आयोजना आफूहरू अहिलेबाटै लागिपरेको बताएका छन्। ‘‘प्रतियागिता स्थगित भएलगत्तै हामीले नयाँ शुरूआत नामको टास्कफोर्स स्थापना गर्&zwj;यौं। र, त्यही दिनदेखि हामीले अभूतपूर्व चुनौतीलाई पार गर्न सक्षम संरचना सिर्जना गर्ने काम गरिरहेका छौं’’, मुरीले भने, ‘‘हामीलाई विश्वास छ विगतका ५-६ वर्षमा तयार गरिएको कुरालाई आगामी वर्षमा पनि निरन्तरता दिन आजको कदम महत्त्वपूर्ण हुनेछ। हामी प्रतियोगिताको सुनिश्चितताको लागि सबै सरोकारवालाहरूसँग मिलेर काम गर्नेछौं।’’