उदयपुरमा भेटिएका १२ जना काेभिड-१९ संक्रमित सप्तरीमा बसेकाे खुलेपछि उनीहरू बसेकाे क्षेत्र सिल
<p>सप्तरी। छिमेकी जिल्ला उदयपुरमा फेला परेका १२ जना कोरोना भाइरस संक्रमित सप्तरीको मस्जिदमा बसेको खुलेपछि उनीहरू बसेकाे क्षेत्र आज सिल गरिएको छ।</p>
<p>कञ्चनरुप नगरपालिका-१, वैरवा र सप्तकोशी नगरपालिका–१ को मस्जिदमा बसेर गएको पत्ता लागेपछि मस्जिद रहेको मुस्लिम टोलमा आवतजावत बन्द गरिएको जिल्ला प्रहरी कार्यालयका प्रहरी उपरीक्षक कृष्ण प्रसाइँले बताए। </p>
<p>सप्तकोशी-१ स्थित मस्जिदमा १५ र १६ फागुनमा संक्रमित १२ जना बसेर गएको प्रत्यक्षदर्शीले बताएको वडा सदस्य जाहिर हुसेनले बताए। बाेदे बर्साइन् नगरपालिका-५, जाँजरमा ३ देखि ५ फागुनसम्म एक लाख बढीको सहभागितामा धार्मिक सम्मेलन ‘इज्तिमा’ भएको थियो। इज्तिमा पछि ठूलो संख्यामा जमाती भारतको सभामा भेला भएर धर्म प्रचारका लागि विभिन्न मस्जिदमा गएकाे बताइएको छ। </p>
<p>पछिल्लोपटक कञ्चनरूप-१ को वैरवास्थित मस्जिद हुँदै सप्तकोशी-१ फत्तेपुरस्थित मस्जिदमा बसेका जमाती नै उदयपुरको त्रियुगा नगरपालिका–३ भुल्केको मस्जिदमा भेटिएकाे मुस्लिम अगुवाहरू बताउँछन्। २५ फागुनमा उदयपुरको चौदण्डीगढी नगरपालिका-५ स्थित सिवाई मस्जिद पुगेका उनीहरू त्यहाँ पाँच दिन बसेपछि त्रियुगा नगरपालिका प्रवेश गरेको बताइएको छ।</p>
<p>कोरोना भाइरस पुष्टि भएका १२ जना वैरवा र फत्तेपुरस्थित मस्जिदमा केही दिन बसेर उदयपुर प्रवेश गरेको खुलेपछि दुवै ठाउँका स्थानीयवासीको आज साँझ आरडीटी परीक्षण शुरू गरिएको छ।</p>
<p>सप्तकोशी-१ का साथै मस्जिद रहेको वडा नम्बर २ र ४ को मस्जिदमा पनि जमाती गएको हुन सक्ने अनुमानमा सो वडासमेत आवतजावत बन्द गरिएको छ। वडा नम्बर २ र ४ मा भाेलि, ७ वैशाखमा आरडीटीबाट परीक्षण गरिने स्वास्थ्य कार्यालयले जनाएको छ। </p>
<p>मस्जिदमा नमाज पढ्न जाने, मदरसामा पढाउने मौलवी, भान्सेसहित संक्रमितको प्रत्यक्ष सम्पर्कमा आएका व्यक्तिलाई पहिलो चरणमा परीक्षण गर्न लागिएको स्वास्थ्य कार्यालयका निमित्त प्रमुख दुनियालाल यादवले बताए। </p>
<p>आरडीटी परीक्षणका लागि वडा नम्बर १ का ७०, वडा नम्बर २ का २०० र वडा नम्बर ३ का ८३ जनालाई छनोट गरिएको सप्तकोशी नगरपालिका-२ का सदस्य जाहिर हुसेनले जानकारी दिए। <em>रासस</em></p>
प्रतिक्रिया दिनुहोस्
.jpg)
