सर्वेक्षण भन्छ- कोभिड-१९ मा ट्रम्पको ‘रेस्पोन्ड’ ढिलो
<p>वासिङ्टन। अमेरिकी राष्‍ट्रपति डोनाल्ड ट्रम्पले कोभिड-१९ महामारीबारे ढिलो ‘रेस्पोन्ड’ गरेकैले त्यति ठूलो संख्यामा हताहती भएको एक सर्वेक्षणका बहुसंख्यक सहभागीले बताएका छन्।</p>
<p>ट्रम्प प्रशासनले महामारीविरुद्ध जुझ्‍न तत्काल कदम उठाएको भए यति ठूलो क्षति नहुने उनीहरूको भनाइ छ। ‘पिउ रिसर्च सेन्टर’ले हालै सार्वजनिक गरेको सर्वेको रिपोर्टअनुसार त्यसमा सहभागी ६५ प्रतिशत बयस्क व्यक्तिले महामारीविरुद्ध विशेष कदम उठाउन राष्‍ट्रपति ट्रम्पले ढिलाइ गरेको बताए।</p>
<p>न्युजविकका अनुसार ५० वर्षमुनिका अमेरिकी नागरिकको धारणा हो त्यो। सर्वेक्षणमा सहभागी ७३ प्रतिशतले कठिन अवस्था आउनै बाँकी रहेको बताए। कोभिड-१९ का कारण दैनिक १५ सयदेखि दुई हजार अमेरिकी नागरिकको मृत्यु भइरहेका बेला उक्त सर्वेक्षण गरिएको थियो।</p>
<p>राष्‍ट्रपति ट्रम्पले भने आफ्नो प्रशासनले फेब्रुअरीदेखि नै कोभिड-१९ विरुद्ध कार्वाही शुरु गरेको दाबी गर्दै आएका छन्। आफूले जनवरीको अन्तिमदेखि चीनबाट हुने उडान बन्द गराएको उनको दाबी छ।</p>
<p>विपक्षी डेमोक्रेटिक दलका समर्थकले आफूलाई दोषी देखाउने गरेको दाबी पनि ट्रम्पले गर्दै आएका छन्।</p>
<p>तर, ट्रम्प प्रशासनले चिकित्सा उपकरणको उत्पादन बढाउनुको साटो सुरक्षा खर्च वृद्धि गरेर कोभिड-१९ को महामारी फैलिन दिएको आरोप उनका आलोचकहरूको छ। महामारीविरुद्ध लड्न अपर्याप्त कानुन मात्र बनाएको उनीहरूको भनाइ छ।</p>
<p>आम सर्वसाधारण मात्र होइन, ट्रम्प प्रशासनकै निर्वाचित अधिकारीहरूले पनि कोभिड-१९ को सन्दर्भमा उनको आलोचना गर्दै आएका छन्।</p>
<p>सर्वेक्षणमा सहभागी ५७ प्रतिशतले महामारीको तथ्यपूर्ण सूचना सर्वसाधारणसम्म पुर्‍याउन पनि ट्रम्प प्रशासन असफल रहेको बताए। थोरै सहभागीले मात्र बाहिर हल्ला भएभन्दा राम्रो अवस्था रहेको बताए।</p>
प्रतिक्रिया दिनुहोस्
.jpg)
