एकै पटक १३ संक्रमित भेटिएपछि मुख्यमन्त्री राईको अपील- 'कोभिड-१९ विरुद्धको लडाईंमा साथ दिनुहोस्'
<p>विराटनगर। प्रदेश १ का मुख्यमन्त्री शेरधन राईले धैर्य र संयमका साथ घरमै बस्‍न आग्रह गर्दै कोरोना जित्‍न प्रदेश सरकार सफल हुने विश्वास जनाएका छन्।</p>
<p>उदयपुरमा एकै पटक १३ जनामा कोभिड-१९ देखिएपछि मुख्यमन्त्री राईले हिजो, ७ वैशाखमा एक अपीलमार्फत् लकडाउनको पूर्ण पालना गर्दै आफू, आफ्नो परिवार, समुदायमा सहयोग पुर्‍याएर कोभिड-१९ विरुद्धको लडाईंमा साथ दिन आग्रह गरेका छन्।</p>
<p>"उपलब्ध अत्यावश्यक स्वास्थ्य सामाग्रीहरु सबै ठाउँ पठाइएको छ। यसरी हामी अहोरात्र कोरोना भाइरस रोकथाम, नियन्त्रणका लागि खटिरहेका छौं। तपाईहरुको सुरक्षाका लागि सरकारले कुनै कसर बाँकी नराख्ने कुरा म पुनः दोहोर्‍याउन चाहन्छु", उनले भने।</p>
<p>अहिले अस्पतालमा उपचार गराइरहेका संक्रमित ११ भारतीय र २ नेपालीको उपचारमा कुनै कमी हुन नदिने राईले बताए।</p>
<p>उनीहरूको 'कन्ट्याक्ट ट्रेसिङ' र आसपासको क्षेत्रमा नमूना परीक्षणको काम भइरहेको मुख्यमन्त्री राईको भनाइ छ।</p>
<p>अहिलेसम्म यस प्रदेशमा ३८७ जनाको पीसीआर प्रविधिबाट कोभिड-१९ परीक्षण भइसकेको छ। त्यस्तै दुई हजार ८१ जनाको र्‍यापिड टेष्‍ट गरिएको छ।</p>
<p>हालसम्म ५३ स्थानमा ४ सय ४९ आइसोलेशन बेड बनेका छन् भने ४४ बेड संख्याको आइसीयू तयार भएको छ।</p>
<p>२५३ ठाउँमा बनाइएका चार हजार ४४९ वटा क्वारेन्टाइन बेडमा ६७६ जनालाई राखिएको छ।</p>
प्रतिक्रिया दिनुहोस्
.jpg)
