चीनबाट ३४० टन स्वास्थ्य सामग्री ल्याउन आज पैसा पठाउँदै सेना
<p>काठमाडौं। नेपाली सेनाले चीनबाट ३४० टन औषधि खरीद गर्ने सम्झौता गरेको छ।</p>
<p>नेपाली सेनाका प्रवक्ता, सहायक रथी विज्ञानदेव पाण्डेले हिजो, ७ वैशाखमा जीटूजी प्रक्रियाबाट स्वास्थ्य सामग्री तथा उपकरण खरीद गर्ने सम्झौता गरेर पठाइएको बताए।</p>
<p>ओम्नी समूहसँग स्वास्थ्य सामग्री खरीद गर्ने सम्झौता रद्द गरेको १८ दिनपछि चीनबाट औषधिसहितका स्वास्थ्य सामग्री ल्याउने सम्झौता भएको हो।</p>
<p>“हामीले सम्झौतामा हस्ताक्षर गरेर पठाइसकेका छौँ। चिनियाँ पक्षले पनि सम्झौतामा हस्ताक्षर गर्छ”,पाण्डेले भने, “त्यसपछि औषधिसहितका स्वास्थ्य सामग्री ल्याउने क्रम शुरू हुन्छ।”</p>
<p>सम्झौता गरिएका स्वास्थ्य सामग्रीको रकम आज पठाउने तयारी छ।</p>
<p>चिनियाँ पक्षले पैसा पठाएको सात दिनभित्रमा स्वास्थ्य सामग्री पठाउन शुरू गर्ने प्रतिबद्धता जनाएको छ।</p>
<p>“पहिलो चरणमा अत्यावश्यक सामानहरू ल्याइने छ”, प्रवक्ता पाण्डेले भने, “चरणबद्ध रूपमा आवश्यक सबै सामान ल्याउने विषयमा कुरा भइसकेको छ। त्यसै अनुसारले सामान आउँछ।”</p>
<p>३४० टन सामग्री ल्याउन एकैपटक सम्भव नहुने भएकाले दुई साताभित्र विभिन्न चरणमा ल्याउने तयारी भइरहेको छ।</p>
<p>चीनबाट ६७ प्रकारका स्वास्थ्य सामग्री ल्याउन लागिएको हो। छाउनीमा स्थापना गरिएको कोभिड-१९ संकट व्यवस्थापन केन्द्र अन्तर्गतको लजिस्टिक क्लस्टरले बनाएको स्वास्थ्य सामग्रीको विवरण अनुसार नेपाली सेनाले चीनसँग खरीद गर्ने सम्झौता गरेको हो।</p>
प्रतिक्रिया दिनुहोस्
.jpg)
