सबै सरकारी कर्मचारीलाई एक महीना पर्यटन विदा दिने योजना बनाउँदै सरकार
<p>काठमाडौं। सरकारले सबै सरकारी कर्मचारीलाई पालैपालो एक महीना पर्यटन विदा दिने गरी योजना बनाइरहेको छ।</p>
<p>कोभिड-१९ को दुष्‍प्रभावका कारण पर्यटन क्षेत्रमा सबैभन्दा धेरै क्षति भएको र त्यसलाई आन्तरिक पर्यटनबाट परिपूर्ति गर्नका लागि सरकारी कर्मचारीलाई विदा दिने कार्यक्रम बनाइरहेको संस्कृति, पर्यटन तथा नागरिक उडड्यनमन्त्री योगेश भट्टराईले बताए।</p>
<p>कोरानाका कारण पर्यटन क्षेत्रका परेको प्रभाव र आगामी योजनाका बारेमा नेपाल आर्थिक पत्रकार समाज (सेजन)ले आयोजना गरेको भिडियो कन्फरेन्समा मन्त्री भट्टराईले आन्तरिक पर्यटन प्रबर्द्धनको योजना बनाइरहेको बताएका हुन्।</p>
<p>कोरोना महामारी अन्त्य हुँदा पनि तत्काल विदेशी पर्यटक बढ्न नसक्ने भएकाले आन्तरिक पर्यटकमार्फत पर्यटन क्षेत्रलाई सक्रिय बनाइराख्‍ने मन्त्री भट्टराईले बताए। </p>
<p>यस्तै, पर्यटन क्षेत्रका मजदुरहरूलाई पर्यटन पदमार्ग विकास र स्तरोन्‍नतिमा खटाउने गरी योजना बनिरहेको उनले बताए। “पर्यटन क्षेत्रका श्रमिकहरूले चाहनुभयो भने पर्यटन पदमार्ग विकास, हिमालको सरसफाइ र पदमार्गमा चिन्हहरू राख्‍ने काममा लगाउँछौं,” उनले भने।</p>
<p>पर्यटन क्षेत्रमा भएको क्षतिलाई परिपूर्ति गर्न आगामी बजेटमा विशेष कार्यक्रम ल्याउने गरी योजना आयोग र अर्थ मन्त्रालयसँग निरन्तर छलफल भइरहेको उनले बताए। क्षतिको आकलनको लागि नेपाल पर्यटन बोर्डले अध्ययन गरिरहेको उनको भनाइ छ।</p>
<p>बोर्डका पूर्वप्रमुख कार्यकारी अधिकृत दीपकराज जोशीले पर्यटन क्षेत्रले आफ्नो विकासको पूर्वतयारीको समयका रूपमा लकडाउनलाई उपयोग गर्नुपर्ने बताए। संकटपछि पनि ठूला अवसर आउने भएकाले त्यसका लागि आशावादी भएर योजना बनाइराख्नुपर्ने जोशीले बताए। </p>
<p>नेपाल होटल एशोशिएशनका द्वितीय उपाध्यक्ष प्रविन पाण्डेले अहिले होटल क्षेत्रका कर्मचारीलाई पूरै तलब दिन नसक्ने भएकाले सरकारसँग छलफल गरिरहेको बताए।</p>
प्रतिक्रिया दिनुहोस्
.jpg)
