पश्चिमाञ्चल क्षेत्रीय अस्पतालमा स्वचालित स्यानिटाइजर टनेल
<p>पाेखरा। पोखरा स्वास्थ्य विज्ञान प्रतिष्ठानअन्तर्गतको पश्चिमाञ्चल क्षेत्रीय अस्पतालमा स्यानिटाइजर टनेल जडान गरिएको छ।</p>
<p>कोभिड-१९ को जोखिम न्यूनीकरणका लागि अस्पतालको पूर्वपट्टिको प्रवेशद्वारमा आज स्वचालित स्यानिटाइजर टनेल जडान गरिएको हो।</p>
<p>प्रोग्रेसिभ इन्जिनियरिङ एशोसिएसन गण्डकीले तयार गरेको सो स्यानिटाइजर टनेल प्रतिनिधि सभा सांसद् एवं पूर्व स्वास्थ्य तथा जनसंख्या मन्त्री खगराज अधिकारीले पोखरा स्वास्थ्य विज्ञान प्रतिष्ठानका उपकुलपति डा. बुद्धिबहादुर थापालाई हस्तान्तरण गरे।</p>
<p>सो टनेलले स्वचालित रूपमा काम गर्छ। मान्छे टनेलमा प्रवेश गर्नेबित्तिकै स्वचालितरूपमा सेनिटाइजर स्प्रे हुने गर्छ।</p>
<p>एक व्यक्तिलाई स्प्रे गर्दा करीब ६० एमएल स्यानिटाइजर खर्च हुने र टनेलमा रहेको २०० लिटर ट्याङकले तीन हजार ४०० जनालाई स्प्रे गर्न पुग्ने एशोसिएसन गण्डकी प्रदेशका कार्यवाहक अध्यक्ष महेन्द्रबहादुर गोदारले जानकारी दिए।</p>
<p>टनेलले होलबडीलाई स्यानिटाइज गरी मानिसको कपडामा भएको भाइरसलाई मार्ने बताउँदै उनले अस्पतालमा भीडभाड हुने भएकाले अस्पतालमा जडान गरिएको बताए।</p>
<p>टनेल निर्माण संयोजक एवं प्रोग्रेसिभ इन्जिनियरिङ एशोसिएसनका सचिव सुरेश तिमिल्सिनाले राष्ट्रिय प्रतिभा पुरस्कारबाट विभूषित युवा वैज्ञानिक विकल्प ढुङ्गाना, इन्जिनियरहरू सुलव तिमिल्सिना, सुनिल दाहाल, टेक कटुवाल, बाबुराम भण्डारी, ध्रुव भट्टराई र विप्लप पोखरेलले चार दिनमा दुईवटा टनेल तयार गरेको जानकारी दिए। <em>रासस</em></p>
प्रतिक्रिया दिनुहोस्
.jpg)
