नेपालयले युट्युबमा ल्यायो स्वरमाला
<p>काठमाडौं । बालबालिकाहरूलाई लयात्मक पारामा नेपाली भाषा सिक्न सजिलो होस् भनेर नेपालयले संगीतकार तथा गीतकार आभाससँगको सहकार्यमा वर्णमाला र स्वरमालाको सांगीतिक रचना तयार पारेको छ । </p>
<p>ती रचना सुन्‍न र हेर्न ‘बाल रचना’ नामक युट्युब च्यानल पनि सञ्‍चालनमा ल्याइएको छ ।</p>
<p>नेपालयले गएको तिहारमा सोही च्यानलमार्फत बालबालिकाका लागि उपहारस्वरूप वर्णमाला (व्यञ्‍जन) सार्वजनिक गरेको थियो ।</p>
<p>अब सोही च्यानलबाट स्वरमाला अथवा अ, आ, इ, ईलाई आधार बनाएर बनेको गीति कार्टुन सार्वजनिक हुने भएको छ । स्वरमालालाई रोचक बनाउन रचनाकार आभासले ‘अक्कलमान’ नामको चरित्र निर्माण गरेका छन् ।</p>
<p>‘अबाट उठ्छ नाम, अक्कलमान हुँ म, अग्लो पर्खाल चढेर, अम्बा टिप्छु म’ स्वरहरूलाई चिनाउनका निम्ति हरेक स्वर-अक्षरलाई आभासले यसैगरी चार हरफका गीतमा उनेका छन् । कार्टुन चित्रसहित हेर्न, सुन्‍न सकिने यो गीतले बालबालिकालाई मनोरञ्‍जन दिनुका साथै अक्षर र शब्द ज्ञान बढाउन पनि मद्दत पुर्‍याउने छ ।</p>
<p>‘बालबालिकाहरू प्राकृतिक र रिदमिक हुन्छन्, त्यसैले उनीहरूलाई भाका र तालले छिट्टै आकर्षित गर्छन् र सजिलै नयाँ कुरा सिक्छन्,’ आभासले भने, ‘त्यही महसुस गरेर मैले शैक्षिक कुरामा पनि धुन भरेको हुँ । यो संसारभरि सफल भएको सिकाउने उत्तम शैली पनि हो । हाम्रो भाषामा यस्ता रचनाहरू अझ धेरै सृजना गर्नु जरुरी छ ।’</p>
<p>वर्णमालामा गायिकाहरू मीना निरौला र बेनुका राईले स्वर दिएका छन् । स्वरमालामा भने रचनाकार तथा संगीतकार आभासकै स्वर छ ।</p>
प्रतिक्रिया दिनुहोस्
.jpg)
