अध्यादेशबारे राजपा र समाजवादी पार्टी आन्तरिक छलफलमा
<p>काठमाडौं । राजनीतिक दल विभाजनसम्बन्धी अध्यादेश हिजो जारी भएपछि राष्‍ट्रिय जनता पार्टी नेपाल(राजपा) अध्यक्ष मण्डलका नेताहरूबीच छलफल शुरु भएको छ । </p>
<p>अध्यादेशको समीक्षा गर्न आज राजपा अध्यक्ष मण्डलका नेताहरूबीच भिडियो कन्फ्रेन्समार्फत छलफल भइरहेको राजपाका महासचिव केशव झाले देखापढीलाई जानकारी दिए ।</p>
<p>उनले भने, “कोरोनाको महामारीविरुद्ध एकजुट भई लड्नुपर्ने बेला अध्यादेश जारी हुनु अलोकतान्त्रिक गतिविधि हो, यसैको समीक्षा गर्न अध्यक्षमण्डलका नेताहरू छलफलमा हुनुहन्छ ।” </p>
<p>छलफलपछि राजपाले वक्तव्य जारी गर्ने तयारी भएको महासचिव झाले बताए । अध्यादेशले तत्काल केही फरक नपर्ने भए पनि दीर्घकालीन रूपमा सबै दललाई असर गर्ने उनले बताए । </p>
<p>त्यस्तै, समाजवादी पार्टीको बैठक बस्‍नेबारे नेताहरूबीच छलफल शुरु भएको छ । अध्यादेशबारे फैलिएको हल्लाबारे पार्टीले जवाफ दिनेगरी छलफल भइरहेको समाजवादी पार्टीका महासचिव गंगानारायण श्रेष्‍ठले बताए । </p>
<p>उनले देखापढीलाई भने, “आजै दुवै अध्यक्ष बाबुराम भट्टराई र उपेन्द्र यादवबीच भेटघाट हुनसक्छ, बैठक बस्‍ने स्थान र समय तय भइसकेको छैन ।” </p>
<p>पार्टीभित्र केही असन्तुष्‍टि रहे पनि अहिलेको अवस्थामा कुनै समस्या नरहेको उनले स्पष्‍ट पारे ।</p>
प्रतिक्रिया दिनुहोस्
.jpg)
