बालबालिकाका लागि युट्यूबमा वर्णमालापछि अब स्वरमाला
<p>काठमाडौं। बालबालिकाहरूलाई लयात्मक पारामा नेपाली भाषा सिक्न सजिलो होस् भन्ने उद्देश्यले नेपालयले संगीतकार तथा गीतकार आभाससँगको सहकार्यमा वर्णमाला र स्वरमालाको सांगीतिक रचना तयार गरेको छ। </p>
<p>नेपाली भाषा सिक्न चाहने संसारभरका नेपाली बालबालिकालाई केन्द्रमा राखेर युट्यूब च्यानल ‘नेपाली बाल रचना’मा स्वरमाला राखिएको हो।</p>
<p>गएको तिहारमा नेपालयले सोही च्यानलमार्फत् बालबालिकाका निम्ति उपहारस्वरूप वर्णमाला (व्यन्जन) सार्वजनिक गरेको थियो।</p>
<p>अब सोही च्यानलबाट स्वरमाला अथवा अ, आ, इ, ईलाई आधार बनाएर बनेको गीति कार्टुन सार्वजनिक हुनेछ। स्वरमालालाई रोचक बनाउनका निम्ति रचनाकार आभासले ‘अक्कलमान’ नामको चरित्र निर्माण गरेका छन्।</p>
<p>कार्टुन चित्रसहित हेर्न, सुन्न सकिने यो गीतले बालबालिकालाई मनोरञ्जन दिनुका साथै अक्षर र शब्द ज्ञान बढाउन पनि मद्दत पुर्‍याउने छ।</p>
<p>वर्णमाला र स्वरमालाका साथै बालबालिकाका निम्ति उपयुक्त गीति रचनाहरूमा थप काम भइरहेको नेपालयका किरणकृष्ण श्रेष्ठले जानकारी दिए।</p>
<p>वर्णमालामा चर्चित गायिकाहरू मीना निरौला र बेनुका राईले स्वर दिएका छन्।</p>
प्रतिक्रिया दिनुहोस्
.jpg)
