एकैदिन ११ जनामा संक्रमण देखिएपछि उदयपुर जिल्ला नै ‘सिल’ गरियो
<p>काठमाडौं। उदयपुरमा आज एकैदिन थप ११ जनामा कोरोना भाइरस संक्रमण पुष्‍टि भएपछि साँझदेखि जिल्लालाई नै ‘सिल’ गरिएको छ।</p>
<p>संघीय सरकारसँग समन्वय गरेर सिल गरिसकिएको प्रदेश १ का मुख्यमन्त्री शेरधन राईले <em>देखापढी</em>लाई बताए।</p>
<p>"एकै ठाउँमा २४ जना भेटिएपछि खतरा निकै बढ्यो। कोरोना संक्रमणमा नेपालकै केन्द्रबिन्दु बन्‍ने देखिएपछि हामीले सबै संयन्त्र त्यहाँ परिचालन गर्ने भएका छौं", मुख्यमन्त्री राईले भने।</p>
<p>उनले भने, "त्यहाँ नेपाली सेनासहितका सुरक्षाकर्मीहरू खटिइसकेका छन्। संक्रमण फैलिन नदिन र सम्भावित संक्रमितको पहिचानका लागि हामी रणनीतिका साथ उपकरण र जनशक्ति परिचालन गर्दैछौँ।"</p>
<p>आज बिहान मात्र प्रदेशका आन्तरिक मामिला तथा कानूनमन्त्री हिक्मत कार्कीको नेतृत्वमा बसेको प्रदेशस्तरीय सुरक्षा संयन्त्रसहितको बैठकले संक्रमित भेटिएको त्रियुगा नगरपालिका-३ भुल्केबस्ती र उनीहरू बढी आवतजावत गरेको चौदण्डीगढी नगरपालिका वडा नम्बर ५ क्षेत्रलाई उच्च निगरानीमा राख्ने निर्णय गरेको थियो।</p>
<p>भुल्केवस्तीस्थित मस्जिदमा रहेका १६ जनामध्ये यसअघि ५ र ६ वैशाखमा ११ भारतीय नागरिक र दुई नेपाली गरी १३ जनामा कोभिड-१९ पुष्‍टि भएको थियो।</p>
<p>त्यसपछि गरिएको 'मास टेष्‍ट' को क्रममा ३२० जनाको थ्रोट स्वाब संकलन गरिएकोमा आज एकै दिनमा आसपासका थप ११ जनाको नतिजा पोजिटिभ आएको छ।</p>
प्रतिक्रिया दिनुहोस्
.jpg)
