स्थापना दिवसमा नेकपा अध्यक्ष ओली र दाहालका छुट्टाछुट्टै वक्तव्य
<p>काठमाडौं। सत्तारुढ नेपाल कम्युनिष्ट पार्टी (नेकपा)का अध्यक्षद्वय केपी शर्मा ओली र पुष्पकमल दाहालबीचको सम्बन्धमा देखिएको चिसोपन आज पार्टी स्थापना दिवसका क्रममा पनि उजागर भएको छ।</p>
<p>नेकपा स्थापना दिवसका अवसरमा दुवै अध्यक्षले छुट्टाछुट्टै वक्तव्य जारी गरेका छन्।</p>
<p>दाहाललाई नेकपाको कार्यकारी अध्यक्ष बनाइएपछि पछिल्लो समय पार्टीका वक्तव्य उनले मात्र जारी गर्दै आएका थिए। आज जारी गरिएका छुट्टाछुट्टै वक्तव्यले यो चिसोपन अझ बढेको देखाएका छन्।</p>
<p>दुई नेताबीचको सम्बन्धमा गत फागुनयता बढ्दै गएको यो चिसोपन ८ वैशाखमा सरकारले जारी गरेका दुईवटा अध्यादेशले उत्कर्षमा पुर्‍याएको थियो। </p>
<p>स्थापना दिवसका अवसरमा जारी गरेको वक्तव्यमा प्रधानमन्त्री एवं नेकपा अध्यक्ष ओलीले पार्टीमा हुर्किएको गुटबन्दी, विभाजन र अराजकतामाथि विराम लगाउँदै एकता र पार्टी पुनर्गठनको अभियान अघि बढाइएको बताएका छन्। </p>
<p>उनले स्थापना दिवसले पार्टीको आन्तरिक एकतालाई थप सुदृढ तुल्याउन र विगत दुई वर्षदेखि जारी एकता प्रक्रियालाई अन्तिम निष्कर्षमा पुर्‍याउन प्रेरणा दिने विश्वाससमेत व्यक्त गरेका छन्। </p>
<p>त्यसैगरी नेकपा अर्का अध्यक्ष दाहालले आफ्नो वक्तव्यमा एकतापछिको नेकपालाई कमजोर पार्न देशी विदेशी प्रतिक्रियावादी शक्तिहरू सक्रिय भएर लागेको दाबी गरेका छन्। </p>
<p>उनले पार्टीभित्र खुला र जनवादी छलफल गरी तथ्यद्वारा सत्यको अन्वेषण गर्ने विधिमार्फत् पार्टी एकतालाई थप सुदृढ बनाउन सकिनेसमेत उल्लेख गरेका छन्।</p>
प्रतिक्रिया दिनुहोस्
.jpg)
