सेती अस्पतालमा ५ शय्याको अलग्गै आईसीयू
<p>कैलाली । सेती प्रादेशिक अस्पताल धनगढीमा कोरोना संक्रमित बिरामीका उपचारका लागि ५ बेडको छुट्टै आईसीयू सञ्‍चालन आएको छ । </p>
<p>प्रादेशिक अस्पतालले सूचना जारी गर्दै २ वटा भेन्टिलेटरसहित ५ बेडको आईसीयू सञ्‍चालन ल्याइएको जानकारी दिएको छ ।</p>
<p>कोरोना भाइरसका जटिल बिरामी भए उनीहरूको उपचारमा सहज होस् भन्‍नका लागि भेन्टिलेटरसहितको आईसीयू सञ्‍चालन गरिएको सेती प्रादेशिक अस्पतालका मेडिकल सुपरिटेन्डेन्ट डाक्टर हेमराज पाण्डेयले बताए।</p>
<p>उनले उक्त आईसीयूमा कोरोना संक्रमितको मात्रै उपचार हुने बताए । डाक्टर पाण्डेयले प्रदेशभित्र कोरोनाको जटिल बिरामी फेला परे यसले उपचार गर्न पनि सहज हुने बताए ।</p>
<p>यस्तै अस्पतालमा पहिलेदेखि सञ्‍चालनमा रहेको एक भेन्टिलेटरसहित ५ बेडको आईसीयुमा दुईवटा भेन्टिलेटर थप गरिएको छ। </p>
<p>सुदूरपश्चिम प्रदेशमा कोरोनाको संक्रमण बढ्दै गएपछि सेती प्रादेशिक अस्पताल र महाकाली अस्पतालले भेन्टिलेटर खरिदको प्रक्रिया अगाडि बढाएका थिए। </p>
<p>हाल प्रदेशभरिमा ३ जना कोरोनाका बिरामीहरूको सेती प्रादेशिक अस्पतालमा उपचार भइरहेको अस्पतालका प्रवक्ता डाक्टर जगदिश जोशीले बताए । उनले दुई जना संक्रमित भने सञ्‍चो भएर घर फर्किसकेको बताए । </p>
<p>प्रदेश सरकारले सेती प्रादेशिक अस्पताललाई कोरोना डेडिकेटेड अस्पताल घोषणा गरिसकेपछि सेती प्रादेशिक अस्पतालकै मातहतमा सञ्‍चालन हुनेगरी धनगढीमा ५० शय्याको आइसोलेसन भवनसमेत निर्माण भइरहेको छ ।</p>
प्रतिक्रिया दिनुहोस्
.jpg)
