कोभिड-१९ विरुद्ध अक्स्फोर्ड विश्वविद्यालयले थाल्यो भ्याक्सिनको परीक्षण
<p>लन्डन। युरोपमा कोभिड-१९ विरुद्धको भ्याक्सिनको पहिलो मानव परीक्षण बेलायतको अक्स्फोर्ड विश्‍वविद्यालयले शुरु गरेको छ। </p>
<p>पहिलोपटक दुई स्वयंसेवकलाई इन्जेक्सन दिइएको छ। अध्ययनका लागि आठ सयभन्दा बढी मानिसलाई सहभागी गराइँदैछ।</p>
<p>तीमध्ये आधालाई कोभिड-१९ भ्याक्सिन दिइनेछ भने आधालाई नियन्त्रण भ्याक्सिन दिइनेछ। नियन्त्रण भ्याक्सिन कोरोना भाइरसको नभई मेनिन्जाइटिसबाट मानिसलाई बचाउन प्रयोग हुँदै आएको छ।</p>
<p>बीबीसीका अनुसार अध्ययनमा सहभागीहरूलाई कुन भ्याक्सिन दिइयो भन्‍ने जानकारी हुने छैन। पहिलोपटक भ्याक्सिन पाएका दुईमध्ये एलिसा ग्रेनाटोले भनिन्, ‘म वैज्ञानिक हुँ र जहाँ पनि वैज्ञानिक प्रक्रियाको समर्थन गर्छु।’</p>
<p>उक्त भ्याक्सिन तीन महीनाको प्रयासमा अक्स्फोर्ड विश्‍वविद्यालयको टोलीले विकास गरेको हो। प्रि-क्लिनिकल रिसर्चको नेतृत्व जेनर इन्स्टिच्युटमा भ्याक्सिनोलोजी प्राध्यापक सराह गिल्बर्टले गरेकी थिइन्।</p>
<p>‘व्यक्तिगत रूपमा यस भ्यासिक्नप्रति मेरो पूर्ण भरोसा छ,’ उनले भनिन्, ‘यसको परीक्षणमार्फत मानिसबाट तथ्यांक प्राप्त गर्नुछ। र, मानिसमाथि व्यापक रूपमा भ्याक्सिनको प्रयोग गर्नुअघि कोरोना भाइरसको संक्रमणबाट मानिसलाई बचाउनु छ।’</p>
<p>उनी यस भ्याक्सिनले कोरोना भाइरसको संक्रमणबाट मानिसलाई बचाउन ८० प्रतिशत काम गर्ने विश्‍वा लिइएको बताउँछिन्। ‘म धेरै आशावादी छु,’ उनले भनिन्।</p>
प्रतिक्रिया दिनुहोस्
.jpg)
