१६ घण्टा बित्दा पनि भोजपुरका कोरोना संक्रमितलाई अस्पताल लगिएन, छलफलमै अलमल
<p>काठमाडौं। पूर्वी पहाडी जिल्ला भोजपुरको हतुवागढी गाउँपालिका-६ होम्ताङ्गका २६ वर्षीय पुरुषलाई कोभिड-१९ पुष्‍टि भएको १६ घण्टा बित्दासम्म उपचारका लागि कहाँ कसरी लैजाने भनेर टुंगो भएको छैन।</p>
<p>स्थानीय सरकार र स्थानीय प्रशासनले औपचारिक बैठकमा एक अर्काको बाटो हेर्दा हेर्दै पहिलो प्राथमिकता बनेको बिरामीको उपचार भने ओझेल परेको छ।</p>
<p>३० फागुनमा साउदीबाट काठमाडौं हुँदै ११ चैतमा घर पुगेका उनको ९ वैशाखमा र्‍यापिड टेष्‍ट नतिजा पोजिटिभ देखिएको थियो।</p>
<p>त्यसपछि धरानस्थिन बिपी कोइराला स्वास्थ्य विज्ञान प्रतिष्‍ठानमा गरिएको थ्रोट स्वाब परीक्षणबाट ती युवालाई कोभिड-१९ पुष्‍टि भएको हो।</p>
<p>आरडीटी परीक्षणमा पोजिटिभ आएसँगै उनलाई घोडेटारको प्राथमिक स्वास्थ्य केन्द्रमा भर्ना गरिएको छ।</p>
<p>आईसीयू, भेन्‍टिलेटर सुविधासहितको अस्पतालमा विशेष निगरानीमा उपचार गर्नुपर्ने बिरामीलाई पूर्वाधार र विशेषज्ञविनाको अस्पतालमा राख्नुले जोखिम बढेको हतुवागढी गाउँपालिकाका नागरिक अगुवा नारायण निरौला टिप्पणी गर्छन्।</p>
<p>"बैठक मात्र बस्छन्। गर्ने काम चाहिँ हुँदैन। फिल्डमै खटिएर काम गर्नुपर्ने यो बेला अलमल किन हो बुझ्नै सकिएन", उनी भन्छन्।</p>
<p>बिरामीलाई गाडीमा धरान पुर्‍याउँदा झण्डै ६ घण्टा लाग्छ।</p>
<p>प्राथमिक स्वास्थ्य केन्द्रमा एमबीबीएसको दरबन्दी भए पनि अहिले कोही चिकित्सक छैनन्। त्यहाँ करारका हेल्थ असिष्‍टेन्टलाई उपचारको सम्पूर्ण जिम्मेवारी दिइएको छ।</p>
<p>संक्रमित भेटिएका वडाका अध्यक्ष सागर राई गाउँपालिकामा बैठक बसिरहेको बताउँछन्।</p>
<p>"प्रशासनबाट के खबर आउँछ। त्यो पनि कुर्दैछौं। उनी विदेशबाट आएदेखि नै सम्पर्कमा रहेका व्यक्तिहरू पनि खोज्नुपर्ने भएकोले केही अलमलजस्तो देखिएको हो", राईले भने, "बिरामीलाई हाच्छ्यूँसम्म पनि आएको छैन। यहाँ पनि उपचारमै छन्। लापरवाही नै गरेको त हैन।"</p>
<p>अहिले जिल्ला प्रशासन कार्यालय भोजपुरमा बिरामी धरान या विराटनगर कहाँ पठाउने भनेर बैठक बसिरहेको छ।</p>
<p>भोजपुरका प्रमुख जिल्ला अधिकारी वसन्तराज पुरीले देखापढीसँग भने, "म एक घण्टापछि बैठक सकेर मात्र के गर्ने भन्‍न सक्छु। सबै सरोकारवालासँग सल्लाह गर्नुपर्‍यो नि पहिले त।"</p>
<p>पुरीको अध्यक्षतामा अहिले कोरोना कमाण्ड पोष्टको बैठकले निर्णय गरेको आधारमा अघि बढिने नागरिक समाज भोजपुरका संयोजक पर्शुराम तिवारी बताउँछन्।</p>
<p>संकटको यो बेला गरिहाल्नुपर्ने काम पनि बैठक र छलफलजस्ता औपचारिकता र कागजी प्रक्रियामा अल्झिँदा जोखिमको त्रासलाई बल पुगिरहेको जिल्लामा टिप्पणी गर्न थालिएको छ।</p>
प्रतिक्रिया दिनुहोस्
.jpg)
