रकम अभावले जनता आवास कार्यक्रमको घर निर्माण अलपत्र
<p>डडेल्धुरा। रकम निकासा नहुँदा डडेल्धुरामा जनता आवास कार्यक्रमको घरहरुको निर्माण कार्य रोकिएको छ।</p>
<p>डडेल्धुरामा आर्थिक वर्ष २०७५/०७६ मा सम्झौता भएर लाभग्राहीले घर बनाइरहेपनि सम्झौताअनुसार रकम नपाउँदा निर्माण भइरहेका घर अलपत्र परेका हुन्।</p>
<p>सम्झौताअनुसार प्रतिघरका लागि लाभग्राहीलाई तीन लाख ३२ हजार रूपैयाँ तीन किस्तामा दिनुपर्ने हो। तर, निर्माण कार्य अन्तिम चरणमा पुग्दासमेत पहिलो किस्ताबापतको ८२ हजार रूपैंया मात्रै पाएको केहि पीडितहरुको गुनासो छ।</p>
<p>कामको प्रगतिको आधारमा रकम दिने भनिए पनि पैसा नपाउँदा ऋण तिर्न नसकिएको अमरगढी नगरपालिका– ६ का राम ताम्राकारले बताए।</p>
<p>प्रदेश सरकारबाट रकम निकासा नहुँदा लाभग्राहीलाई बाँकी रकम दिन नसकेको शहरी विकास तथा भवन डिभिजन फिल्ड कार्यालय डडेल्धुराका सव इञ्‍जिनीयर कृष्णबहादुर रोकायाले बताए।</p>
<p>आर्थिक वर्ष २०७५/०७६ मा डडेल्धुरामा १९० घर निर्माणको सम्झौता भएको थियो। अहिलेसम्म ७ जनाले मात्र पूरा रकम पाएका छन्। १०० जनालाई पहिलो किस्ताबापतको रकम दिइएको छ। त्यस्तै ३० जनाले दोस्रो किस्ताबापतको रकम पाएका छन्। </p>
<p>शहरी विकास फिल्ड कार्यालयका अनुसार रकम अभावमा ७ जनालाई पहिलो किस्ता रकम नै दिइएको छैन। <em>रासस</em><br />
</p>
प्रतिक्रिया दिनुहोस्
.jpg)
