डोल्पा अस्पतालमा शल्यक्रियासहितको प्रसूति सेवा
<p>डाेल्पा। डाेल्पा सदरमुकाम दुनैमा रहेको एक मात्र जिल्ला अस्पतालले शल्याक्रियासहितको प्रसूति सेवा दिन थालेकाे छ।</p>
<p>अस्पतालले प्रसूति तथा स्त्रीरोग विशेषज्ञ चिकित्सक नै नियुक्त गरेर शल्यक्रियासहितको प्रसूति सेवा शुरू गरेकाे हाे।</p>
<p>जिल्लामै जटिल अवस्था भएका गर्भवतीको पनि सफल शल्यक्रिया हुन थालेकाले विकट गाउँबस्तीबाट सुत्केरी गराउन आउने गरेका छन्।</p>
<p>अस्पतालले भरपर्दो सेवा सुविधा दिन थालेपछि सुरक्षित सुत्केरी गराउनकै लागि नेपालगञ्ज, काठमाडाैं, सुर्खेतलगायतका जिल्ला बाहिरका शहरमा जानुपर्ने अवस्था हटेको छ।</p>
<p>मंसीरयता मात्रै ज्यानै जोखिममा परेका आठ गर्भवतीको सफल शल्यक्रिया गर्न सफल भएको प्रसूति तथा स्त्रीरोग विशेषज्ञ चिकित्सक शङ्करप्रसाद राउतले जानकारी दिए।</p>
<p>“पेटमा उल्टो बच्चा भएको, बच्चा खेल्ने पानी सुकेका, सुत्केरी हुन तोकिएको म्याद नाघेर पनि सुत्केरी हुन नसकेकालगायत जटिल प्रकारको शल्यक्रिया पनि सफल रूपमा गरेका छाैं”, डा राउतले भने।</p>
<p>कर्णाली स्वास्थ्य विज्ञान प्रतिष्ठानको टोली नआउँदा दुई वर्षसम्म डोल्पा अस्पतालको सम्पूर्ण शल्यक्रिया सेवा ठप्प भएको थियो।</p>
<p>सुरक्षित प्रसूति सेवा नपाएर अकालमा ज्यान गुमाउँदै आएका ग्रामीण महिलालाई विशेषज्ञ सेवा दिएर ज्यानसँगै जिल्ला बाहिर लैजाँदा लाग्ने लाखौँ रकम जोगिएको अस्पताल प्रमुख डा. सिजन रावलले जानकारी दिए। <em>रासस</em></p>
प्रतिक्रिया दिनुहोस्
.jpg)
