बागलुङकी अंशु सापकोटाले पनि जितिन् कोरोनालाई, निको भएर अस्पतालबाट घर फर्किइन्
<p>काठमाडौं। कोभिड-१९ पोजिटिभ देखिएर धौलागिरि अञ्चल अस्पतालमा उपचार गराइरहेकी अशुं सापकोटा आज अस्पतालबाट डिस्चार्ज भएकी छिन्।</p>
<p>उनको पछिल्लो दुईवटा परीक्षण नेगेटिभ आएपछि अस्पतालबाट डिस्चार्ज गरिएको धौलागिरी अस्पतालका प्रमुख, मेडिकल सुपरिटेण्डेन्ट डा. शैलेन्द्र बि.के पोख्रेलले बताए।</p>
<p>सापकोटाको घर अस्पताल नजिकै रहेकाले उनलाई राति भए पनि डिस्चार्ज गरिएको पोख्रेलले बताए।</p>
<p>सापकोटा नेपालमा कोरोना संक्रमित भएकी पाँचौं व्यक्ति हुन्।</p>
<p>उनी २ चैतमा बेल्जियमबाट कतारको दोहा हुँदै कतार एअरको क्यूआर ६५२ नम्बरको फ्लाइटमा काठमाडौं आएकी थिइन।</p>
<p>१५ चैतमा उनमा कोरोना पोजिटिभ पुष्टि भएको थियो। त्यसयता उनी धौलागिरि अस्पतालमा उपचार गराइरहेकी थिइन्।</p>
<p>उनीसँग आएकी ६५ वर्षीय मनकुमारी पौडेल भने यसअघि नै सफल उपचार गरेर घर फर्किएकी छिन्।</p>
<p>सापकोटा कोभिड-१९ निको भएर घर फर्किने ११औं व्यक्ति हुन्।</p>
प्रतिक्रिया दिनुहोस्
.jpg)
