कोरोना संक्रमित ११ जना निको भए, उपचाररत ३८ जनाको अवस्था पनि सामान्य
<p>काठमाडौं। नेपालमा आज कोरोना भाइरस संक्रमणका एकजना बिरामी थपिएकै दिन एकजना निको भएर घर फर्किएका छन्।</p>
<p>झापामा ६२ वर्षीय पुरुषमा आज कोभिड–१९ पुष्टि भयो। र, आजै बागलुङकी १९ वर्षीया अंशु सापकोटा कोरोनालाई जितेर घर फर्किइन्। उनलाई गएको १५ चैतमा कोरोना भाइरस संक्रमण पुष्टि भएको थियो। </p>
<p>नेपालमा कोरोना भाइरस भित्रिनु दुःखद् भएपनि यसको विस्तार र क्षतितर्फ भने नेपाल अहिलेसम्म सुखद् अवस्थामा छ। </p>
<p>जम्मा ४९ जनामा संक्रमण हुँदा अहिलेसम्म ११ जना निको भएर घर फर्किसकेका छन्। प्रतिशतका हिसाबले हेर्दा यो २२.५ प्रतिशत हो। </p>
<p>र, उपचाररत ३८ जनाको अवस्थामा पनि सामान्य रहेको सम्बन्धित् अस्पतालहरूले जनाएका छन्। नेपालमा ८१ र ६५ वर्षीया वृद्धाले समेत कोरोनालाई पराजित गरिसकेका छन्।</p>
<p>पछिल्लो २४ घण्टाको विवरण अनुसार विश्वमा संक्रमितको संख्या २६ लाख २६ हजार ३२१ पुगेको छ। </p>
<p>विश्व स्वास्थ्य संगठनका अनुसार मृत्यु हुनेको संख्या एक लाख ८१ हजार ९३८ छ भने सात लाख ५६ हजार ८३३ जना निको भएर घर फर्किएका छन्।</p>
<p>छिमेकी देश भारतमा मात्रै संक्रमितको संख्या २३ हजार ७७ पुगेको छ। भारतमा पाँच हजार १२ जनाले कोरोनासँगको लडाइँ जित्दा ७१८ जनाले ज्यान गुमाएका छन्। </p>
<p>अहिले विश्वका २१३ देशमा कोरोना भाइरस संक्रमण फैलिएको छ। </p>
प्रतिक्रिया दिनुहोस्
.jpg)
