लकडाउनका बेला हेटाैंडाका उद्योगमा दैनिक ३० करोड घाटा
<p>हेटाैंडा। लकडाउन लम्बिँदै जाँदा हेटाैंडाका उद्योगमा दैनिक ३० करोड रूपैयाँ घाटा भइरहेको छ।</p>
<p>हेटौंडा औद्योगिक क्षेत्रमा ठूला र मझौला गरी १११ उद्योग छन्।</p>
<p>औद्योगिक क्षेत्रमा पाँच हजार कर्मचारीरसहित मजदुर कार्यरत छन्। लकडाउनका कारणले उद्योग बन्द भएपछि अहिले उद्योगको अवस्था दयनीय छ भने मजदुरको समेत रोजगारी गुमेको छ।</p>
<p>लकडाउन हुनुभन्दा अगाडि प्रत्येक उद्योगको करीब तीन करोड रूपैयाँभन्दा बढीको कारोबार हुने गरेको थियो।</p>
<p>हेटौंडा औद्योगिक क्षेत्र व्यवस्थापन लिमिटेड कार्यालयका अनुसार अतिआवश्यक वस्तुहरू उत्पादन गर्ने २०-२१ उद्योग मात्र सञ्चालनमा छन्। समाजिक दूरी तथा स्वास्थ्य जाँचको समेत व्यवस्था गरिएको ती उद्योगसमेत आंशिकरूपमा चलेको बताइन्छ। उद्योगमा कच्चा पदार्थ, मजदुर अभाव, दुवानी र बिक्री वितरणको समस्याले आंशिकरूपमा चलेको छ।</p>
<p>कार्यालय प्रमुख राजेन्द्र कँडेलका अनुसार अतिआवश्यक वस्तु उत्पादन गर्ने उद्योगमा दुग्ध उद्योग, खानेपानी उद्योग, बेकरी तथा बिस्कुट उद्योग, मैदा उद्योग, पशुपक्षी दाना उद्योग, प्लास्टिक उद्योगलगायतका उद्योग सञ्चालनमा छन्।</p>
<p>सञ्चालित उद्योग पनि मझौला उद्योगहरू हुन्। उद्योग बन्दले घाटा खानुपरेकाले बैंकको ऋण तिर्न समस्या परेको तथा कर्मचारीको तलब दिनुपर्नेलगायतका थुप्रै समस्या आएको उद्योग संघले जनाएको छ।</p>
<p>संघका अध्यक्ष लेखराज पोखरेलको अनुसार उद्योगीको व्यापक गुनासो रहेको उल्लेख गरे। उद्योग बाहिर बस्ने मजदुरलाई काम गर्न जाँदा बाटोमा प्रहरीले अप्ठ्यारो पार्ने गरेको मजदुरको गुनासो छ।</p>
<p>त्यस्तै हेटौंडा सिमेन्ट उद्योग, शिवम सिमेन्ट उद्योग, रिद्धिसिद्धि सिमेन्ट उद्योग र एशियन पेन्टस उद्योगलगायतका अन्य ठूला उद्योग बन्द छन्।</p>
प्रतिक्रिया दिनुहोस्
.jpg)
