मुख्यमन्त्री गुरुङले भने- ‘लकडाउनमा उत्पादन र निर्माण रोक्न हुँदैन’
<p>पाेखरा। गण्डकी प्रदेशका मुख्यमन्त्री पृथ्वीसुब्बा गुरुङले लकडाउनका बेला उत्पादन र निर्माणलाई रोक्न नहुने बताएका छन्।</p>
<p>प्रदेश सरकारले कोरोनाको जोखिम हुन नदिन गरेका काम एवं जारी लकडाउनका सन्दर्भमा आज सञ्चारकर्मीसँगको अन्तरक्रियामा उनले उत्पादन र निर्माण प्रभावित बन्दा सर्वसाधारणको दैनिकीका साथै मुलुकको अर्थतन्त्रमा असर पुग्ने देखिएकाले यसलाई सँगसँगै अघि बढाउनुपर्ने बताएका हुन्।</p>
<p>उत्पादन र निर्माण ठप्प हुँदा जनजीवन थप असहज जस्तो बनिरहेको उल्लेख गर्दै मुख्यमन्त्री गुरुङले लकडाउन जारी रहेका अवस्थामा उत्पादन र निर्माणको कार्यलाई सुरक्षित तवरले अघि बढाउने सोच राखेको जानकारी दिए।</p>
<p>औपचारिक अर्थतन्त्रलाई बलियो नबनाएसम्म राज्य बलियो नहुने बताउँदै उनले संघ, प्रदेश र स्थानीय तहबाट सञ्चालित विकास निर्माणका कार्य अघि बढ्ने र मजदुरको दैनिकीमा पनि राहत मिल्ने विश्वास व्यक्त गरे।</p>
<p>कोरोना भाइरसको जोखिमलाई अवसरका रूपमा लिनुपर्ने उल्लेख गर्दै मुख्यमन्त्री गुरुङले भने, “मुलुकमा स्वास्थ्य सेवालाई प्रभावकारी बनाउनुपर्ने आवश्यकता यतिखेर पुष्टि भएको छ।”</p>
<p>गण्डकी प्रदेशका प्रत्येक जिल्ला अस्पतालमा विशिष्ट सेवा प्रदान गर्ने लक्ष्यका साथ भौतिक निर्माण एवं आवश्यक स्वास्थ्य उपकरणको व्यवस्था गरिने तयारी भइरहेको उनले जानकारी दिए। उनले हिमालपारिका जिल्ला मनाङ र मुस्ताङमा दुई/दुई र अन्य ९ जिल्लामा पाँच शय्याको आकस्मिक कक्ष निर्माण गरिने जानकारी दिए।</p>
<p>प्रदेशको बागलुङ जिल्लामा देखिएका दुईजना कोरोना सङ्क्रमित धौलागिरि अञ्चल अस्पतालबाट उपचार गरी निको भएर घर फिर्ता भइसकेको बताउँदै मुख्यमन्त्री गुरुङले अन्य संक्रमित नभए पनि बाहिरी जिल्लाबाट आउने व्यक्तिबाट रोग सर्न सक्ने भएका कारण प्रत्येक व्यक्ति सचेत हुनुपर्नेमा जोड दिए।</p>
<p>गण्डकी प्रदेशमा हालसम्म बाहिरबाट आएका ४७ हजार जनाको पीसीआर, आरडीटी परीक्षणमा नेगेटिभ देखिएको उनकाे भनाइ छ।</p>
<p>प्रदेश सरकारले पश्चिमाञ्चल क्षेत्रीय अस्पताललाई कोरोना डेडिकेटेड अस्पतालका रूपमा विकास गरी १० शय्याको आईसीयू कक्ष सञ्चालन गरेको बताउँदै मुख्यमन्त्री गुरुङले लेखनाथ लायन्स सामुदायिक अस्पताललाई सरुवारोग नियन्त्रण अस्पतालका रूपमा विकास गर्ने तयारी भइरहेको जानकारी दिए।</p>
<p>यसैबीच गण्डकी प्रदेशको बागलुङस्थित धौलागिरि अञ्चल अस्पतालमा कोरोना संक्रमित भई उपचारपश्चात् घर फर्किएकी ६५ वर्षीया मनकुमारी पौडेल र १९ वर्षीया अंशु सापकोटालाई गण्डकी प्रदेशका मुख्यमन्त्री गुरुङले बधाई दिएका छन्।</p>
<p>आज एक वक्तव्य प्रकाशित गरी दुवैजना अस्पतालबाट निको भई घर फर्किएको खबरले आफू अत्यन्त खुशी भएको बताउँदै उनले चिकित्सकको सुझाव सल्लाहबमोजिम आफ्नो स्वास्थ्यको निरन्तर ख्याल गर्न आग्रह गरेका छन्। </p>
<p>मुख्यमन्त्री गुरुङले साधन स्रोतको सीमितताको बीचमा पनि उच्च मनोबल र धैर्यताका साथ उपचारमा अहोरात्र खट्ने चिकित्सक एवं स्वास्थ्यकर्मी, व्यवस्थापन समिति तथा अस्पताल परिवारलाई धन्यवाद व्यक्त गरेका छन्। <em>रासस</em></p>
प्रतिक्रिया दिनुहोस्
.jpg)
