Others

गृहपृष्ठ

यसरी ल्याउँदैछ नेपाली सेनाले स्वास्थ्य सामग्री काठमाडाैं। कोभिड–१९  को संक्रमणसँग जुध्न आवश्यक पर्ने स्वास्थ्य सामग्री खरिद गरी ल्याउने विषयमा आवश्यक प्रक्रिया द्रुतगतिमा अगाडि बढिरहेको नेपाली सेनाले जनाएको छ। सरकारको निर्देशनमा सेनाले चीन र भारतबाट अत्यावश्यक स्वास्थ्य सामग्री खरिदका लागि सरकार–सरकार (जीटुजी) मार्फत् प्रक्रिया अगाडि बढाएको हो। तत्कालका लागि आवश्यक पर्ने अत्यावश्यक सामग्री हवाई माध्यमबाट ल्याउने तयारी गरिएको छ। यस्तै केही सामान भने स्थलमार्गबाट ल्याउने तयारी भइरहेको छ। छिटोभन्दा छिटो सामग्री ल्याउनका लागि गरिएको पहलअनुसार नै काम भइरहेको नेपाली सेनाका प्रवक्ता विज्ञानदेव पाण्डेले जानकारी दिए। कोभिड-१९ क्राइसिस म्यानजेमेन्ट सेन्टर (सीसीएमसी)ले आज छाउनीस्थित नेपाली सेनाको रेञ्जर गणमा आयोजित पत्रकार सम्मेलनमा प्रवक्ता पाण्डेले सामान आयातका लागि विभिन्न ११ संस्था इच्छुक देखिएको जानकारी दिए।  <blockquote> अत्यावश्यक सामान खरिदका लागि सेनाले एक करोड ८४ लाख ४१ हजार ७०६.३५ अमेरिकी डलर भुक्तानी गरिसकेको छ। </blockquote> उनीहरूको निवेदनअनुसार छनोट प्रक्रिया जारी छ। १२ वैशाखमा तीनदिने म्याद राखेर गरिएको आह्वानमा इच्छुक देखिएकाहरूको छनोट गरी सामान आयातको जिम्मा दिन लागिएको उनको भनाइ छ। सेनाले चिनियाँ पक्षसँग खरिद सम्झौता सम्पन्न भई रकमसमेत भुक्तानी भइसकेकाले खरिद प्रक्रिया टुङ्गिएको जनाएको हो। पैसा पठाएको सातदेखि १० दिनभित्र चीनबाट सामान उपलब्ध गराउने जानकारी आएको बताउँदै उनले ढुवानीका लागि लाग्ने रकमका सम्बन्धमा रक्षा मन्त्रालय हुँदै अर्थ मन्त्रालयमा आग्रह गरिएको बताए। अत्यावश्यक सामान खरिदका लागि सेनाले एक करोड ८४ लाख ४१ हजार ७०६.३५ अमेरिकी डलर भुक्तानी गरिसकेको छ। त्यसमा ढुवानी भाडा भने जोडिएको थिएन। नेपालले भुक्तानी गरेको रकम पाइसकेको पनि चिनियाँ पक्षले जानकारी दिइसकेको उनकाे भनाइ छ। चीनबाट ३४२ टन स्वास्थ्य सामग्री जीटुजी प्रक्रियाबाट खरिद गर्न लागिएको हो। कूल ६७ प्रकारका स्वास्थ्य सामग्री खरिदका लागि सेनाले चिनियाँ पक्षलाई रकम भुक्तानी गरिसकेको हाे। स्वास्थ्य उपकरण खरिदका लागि चीन सरकारको स्वामित्वमा रहेको चाइना साइनोफार्म इन्टरनेशनल कर्पोरेसनसँग सम्झौता भएको हो। दुई देशबीच भएको सम्झौतामा रकम भुक्तानी गरेको एक साताभित्र सबै सामग्री चिनियाँ पक्षले ग्वान्जाओमा जम्मा गरिदिने जनाएको छ। ती सामानमध्ये अत्यावश्यक सामान आयातका लागि हवाइजहाज पठाइनेछ। जहाजबाट तीन खेपमा सामान ल्याउने तयारी छ। यस्तै स्थलमार्गबाट आउने सामान भने ग्वान्जाओबाट सात दिन लगाएर नेपालको तातोपानी आइपुग्नेछ। भन्सार जाँच प्रक्रियाका लागि दुई दिन लाग्ने जनाइएको छ। अत्यावश्यक सामग्री हवाईमार्गबाट ल्याउने विषयमा हवाईसेवा प्रदायकसँग छलफल भइरहेको उनले जानकारी दिए। “हामीले नेपाल एअरलाइन्स र श्रीएअरसँग छलफल गरिरहेका छौँ”, पाण्डेले भने, “ग्वान्जाओमा सामग्री जम्मा भएपछि निष्कर्षमा पुगिनेछ।” <blockquote> व्यक्तिगत सुरक्षाका सामग्री (पीपीई), मास्क, कोरोना परीक्षणका लागि आवश्यक कीटलगायत अत्यावश्यक सामग्री हवाई र अन्य सामग्री सडकमार्ग हुँदै ल्याउने तयारी गरिएको छ। </blockquote> अत्यावश्यक बाहेकका सामग्री सडक मार्गबाट ढुवानीका लागि छलफल भइरहेको उनले जानकारी दिए। बेइजिङस्थित नेपाली दूतावास तथा ग्वान्जाओस्थित महावाणिज्य दूतावासमार्फत् पनि चिनियाँ ढुवानीकर्तासँग नियमित छलफल भइरहेको छ। अत्यावश्यक सामग्री तातोपानी नाकामा ल्याएर अर्को गाडी राखेर नेपाल ल्याउनेभन्दा पनि सकभर चिनियाँ ढुवानीकर्ताको साधनबाट एकैचोटी डिपोमा ल्याउने तवरले कुराकानी भएको छ। चीन सरकारले नेपाललाई आवश्यक स्वास्थ्य सामग्री उपलब्ध गराउन प्राथमिकता दिएको छ। कोरोनाले विश्वव्यापी महामारीको रूप लिएसँगै प्रभावित मुलुकमा चीनले स्वास्थ्य सामग्री आपूर्ति गरिरहेको छ। प्रवक्ता पाण्डेले महामारीको अवस्थामा चीनबाट स्वास्थ्य सामग्री खरिद गर्ने मुलुकको सूचीमा नेपाल ८१औँ स्थानमा रहे पनि चिनियाँ पक्षले नेपाललाई जतिसक्दो चाँडो आवश्यक सामग्री उपलब्ध गराइदिने बचनबद्धता व्यक्त गरेको पनि जानकारी दिए। व्यक्तिगत सुरक्षाका सामग्री (पीपीई), मास्क, कोरोना परीक्षणका लागि आवश्यक कीटलगायत अत्यावश्यक सामग्री हवाई र अन्य सामग्री सडकमार्ग हुँदै ल्याउने तयारी गरिएको छ। प्रवक्ता पाण्डेले भारतबाट कोभिड-१९ का बिरामीलाई दिइने औषधि खरिद गर्ने विषयमा पनि छलफल भइरहेको बताए। सरकारले भारतबाट ५३ प्रकारको औषधि ल्याउने तयारी गरेको छ। “हामीले नेपाललाई आवश्यक पर्ने औषधिको सूची पठाएका छौँ, भारतीय पक्षसँग औषधि खरिदपछि भुक्तानी गरे पनि हुने जनाएको छ। भारतको वीपीपीआईसँग औषधि खरिदका लागि सम्झौता भएको छ। कूल ५३ प्रकारको औषधि भारतबाट ल्याउन लागिएको हो”, उनले भने। यस्तै स्वास्थ्य सेवा विभागले बोलपत्रमार्फत् खरिद गरेका स्वास्थ्य सामग्री पनि केही आयात भइसकेको र केही आउने क्रममा रहेको स्वास्थ्य तथा जनसंख्या मन्त्रालयका प्रवक्ता डा. विकास देवकोटाले जानकारी दिए। “अत्यावश्यक सामग्री खरिदका लागि भएको प्रयासअनुसार नै काम भएको छ। केही सामान आइसकेको छ भने केही आउने क्रममा छन्”, उनले भने। यस्तै १० चैतमा चीन सरकारले सहयोगस्वरूप पीसीआर मेसिन दुई, पीसीआर रिजेन्ट २० हजार, भीटीएम २० हजार र पीपीई १० हजार सहयाेग गरेकाे छ। साथै सिङ्गापुरबाट १२ चैतमा १० हजार थान पीसीआर परीक्षण किट प्राप्त भएको छ। देशभर नै पीपीई, परीक्षण किट, औषधि र औषधिजन्य सामग्रीलगायत कोभिड-१९ संक्रमण तथा रोकथामका लागि आवश्यक पर्ने वस्तु पर्याप्त मात्रामा मौज्दात राख्नका लागि ३० आपूर्तिकर्तालाई स्वास्थ्य सेवा विभागमार्फत २० लाख एक हजार ३५६ अमेरिकी डलर बराबरको सटही सुविधा प्रदान गरिएको प्रवक्ता डा. देवकोटाले जानकारी दिए। रासस