उदयपुरका संक्रमितको 'ट्राभल हिस्ट्री' को आधारमा परीक्षण थालियो, सप्तरीमा ४३ जनाको नमूना संकलन
<p>सप्तरी। उदयपुरको त्रियुगा नगरपालिका-३ भुल्केमा फेला परेका सङ्क्रमित बसेको कञ्चनरुप नगरपालिकामा ४३ जनाको थ्रोट स्वाब संकलन गरिएको छ ।</p>
<p>वडा नम्बर १ वैरवा र २ बरमझिया आसपासका ३४ जना र नगरपालिकाद्वारा सञ्चालित क्वारेन्टाइनमा बसेका नौ जना गरी ४३ जनाको स्वाब सङ्कलन गरिएको नगरपालिका स्वास्थ्य शाखाका वरिष्ठ अधिकृत डम्बरप्रसाद गुप्ताले बताए।</p>
<p>क्वारेन्टाइनमा बसेका नौ जना भारतबाट आएका स्थानीयवासी हुन्। क्वारेन्टाइनमा रहेका बाँकी २२ जनाको पनि आरडिटी परीक्षण गरिएको छ ।</p>
<p>स्वास्थ्य सेवा विभाग इपिडिमियोलोजी तथा रोग नियन्त्रण महाशाखाको टोलीले पीसीआर विधिबाट परीक्षणलाई तीब्र बनाएको छ।</p>
<p>दुई दिनअघि सप्तरीको बोदे बर्साइनबाट १६१ जनाको स्वाब सङ्कलन गरिएको थियो।</p>
<p>प्राविधिकको टोली स्वाब सङ्कलन गर्न सप्तकोशी नगरपालिका-१ फत्तेपुर पुगेको छ ।</p>
<p>उदयपुरको सीमामा रहेको फत्तेपुरमा १०० को स्वाब सङ्कलन गर्ने लक्ष्य रहेको टोलीमा सहभागी महाशाखाका फणिन्द्र ज्ञवालीले बताए।</p>
<p>यसअघि सप्तकोशी नगरपालिकाको वडा नम्बर १, २ र ४ मा १७१, कञ्चनरुप नगरपालिका २ र १२ मा ६६ को आरडीटी गरिएको थियो । <em>रासस</em></p>
प्रतिक्रिया दिनुहोस्
.jpg)
