Others

गृहपृष्ठ

कोरोनाको सफल उपचार गरेका डा. पोखरेल भन्छन्- ‘खुशीको सीमा छैन’ पोखारा । “कहिलेकाहीँ लाग्छ चिकित्सक पेशा जस कम र अपजस बढी हुने पेशा हो। सन्तुष्टिका पल भेटिन्छन्। पेशाप्रति जिम्मेवार भएर लागिरहँदा जुन सफलता मिल्छ त्यसले अपजसमा अल्झिन दिदैँन।”  यी अनुभूति धौलागिरि अञ्चल अस्पतालका मेडिकल सुपरिटेन्ट डा. शैलेन्द्र पोखरेलका हुन्।      चिकित्सक पेशाको १५ वर्षीय दौडानमा उनले धेरैपल्ट हर्ष र विस्मातका परिवेशसँग ठोकिनुपरेको छ। बिरामीको उपचारमा मिल्ने सफलताले दिलाएको हर्ष र उपचार सम्भव नहुँदा आँखा अगाडि बिरामीले संसार छोडेका धेरै घटनाले उनलाई दुःखी बनाएको छ।      उनलाई पछिल्लो पटकको मिलेको सन्तुष्टि भनेको कोराना सङ्क्रमित अंशु र मनकुमारीलाई निको बनाएर घर फर्काउँदाको हो। उनले भने, “चिकित्सक पेशा नै यस्तो हो जहाँ बिरामीलाई निको बनाएर जीवन दिनु र उहाँका परिवारमा खुशी दिनुसँग जोडिन्छ, त्यहीभित्रको आनन्दले पेशाप्रति सधैँ गर्व लाग्छ, पछिल्लो समय कोरोना भाइरसबाट बागलुङमा पनि दुई सङ्क्रमित देखिए, पर्याप्त पूर्वाधारबिना नै उहाँहरूलाई भर्ना गरेर सफल उपचारपछि घर फर्काउन सफल हुँदाको पलले सन्तुष्ट मिलेको छ।”      डा. पोखरेलले त्यो क्षण सम्झदै भने, “१५ चैतमा बागलुङ नगरपालिका वडा नं ४ कि अंशुको स्वाबको परीक्षण पोजिटिभ आयो। धौलागिरि अस्पताल कोरोनाको ‘डेडिकेटेट’ अस्पताल थिएन, आवश्यक उपकरण पनि थिएन, सबैभन्दा पहिले आवश्यक पीपीई पनि हामीसँग थिएन, एकछिन त के गरौँ कसो गरौँ भयो। प्रमुख जिल्ला अधिकारीलगायतसँग बैठक बस्यौँ, पोखरा, काठमाडौंका चिकित्सकसँग सल्लाह पनि गर्&zwj;यौँ, उहाँहरूले सकेसम्म उतै उपचार गरे हुन्थ्यो भन्ने आशय व्यक्त गर्नुभयो। धेरै नै ढिला हुने जस्तो भएपछि मैले बागलुङमै भर्ना गर्ने निर्णय गरेँ, जोखिम मोलेर जुन कदम चालियो अन्ततः सफल भयो”, उनले भने, “तत्कालको निर्णयले पनि सबै राम्रो भयो, बागलुङ जिल्ला अहिले ग्रिन जोनमा पर्न सफल भएकामा खुशी लागेको छ।”  उनले अंशु भर्नापछि मात्र प्रदेश सरकार र सङ्घीय सरकारबाट पीपीई आएको जानकारी दिए। “हामीसँग पीपीईसमेत थिएन, स्थानीय स्रोत साधनको उपयोग गरेर बनाएका केही थान पीपीई थिए तर, कोरोनाको लागि भरपर्दो थिएनन्। अंशुको अस्पतालको आइसोलेसन उपचाररत रहिरहँदा बागलुङकै ६५ वर्षीय महिलामा पनि सङ्क्रमण देखियो, उहाँलाई पनि हामीले अस्पतालमा भर्ना गर्&zwj;र्यौं, दैनिक डाक्टर, नर्स र सहयोगीले उहाँहरूको स्वास्थ्य निगरानीमा खटिनुभयो।”  डा. पोखरेलले भने, “यो सफलतामा डा. प्रदीप श्रेष्ठ, डा. मछिन्द्र लामिछाने, डा. पुजन बल्ल, डा. मिलन श्रेष्ठ, डा. दीपक मगराँतीलगायत अन्य डाक्टर, नर्स र सहयोगी सबैको उत्तिकै योगदान छ।”      उपचारका क्रममा अंशुमा त्यस्तो स्वास्थ्य समस्या नदेखिएको तर, मनकुमारीले भने नियमित दमको औषधि सेवन गर्दै आएको र अस्पताल आएपछि उच्च रक्तचापको समस्या देखिएको उनले बताए। “उहाँले शुरूमा रक्तचापको औषधि खान मान्नुभएन, हामीले विशेष अनुरोध गरेर सम्झाएपछि बल्ला औषधि सेवन गर्नुभयो र विस्तारै उहाँको अवस्था सामान्य हुँदै आयो।”      उपचारमा मनोचिकित्सक धीरेन्द्र पौडेलको भूमिका पनि महत्वपूर्ण रहेको स्मरण गरे। “मनोपरामर्शबाट पनि उहाँहरूको आत्मबल बढाउन सक्रिय रह्यौँ चिकित्सक एवं स्वास्थ्यकर्मीको आग्रहलाई उहाँहरूले पनि पूर्ण पालना गर्नुभयो। यसले हामीलाई पनि सहज बनायो र उहाँहरूको स्वास्थ्यलाभ हुँदै गयो।”  १५ चैतमा भर्ना गरिएकी अंशुभन्दा २० चैतमा भर्ना भएकी मनकुमारीमा १७ दिनमा कोरोना नेगेटिभ आएको थियो। तर, अंशुमा पोजिटिभ देखिएपछि अंशुमा असर पर्छ कि भनेर विशेष सतर्कता अपनाएर, मनोचिकित्सकसहितको टोली मनोपरामर्शमा जुटेको उनले बताए।। “अन्ततः पाँचौं पटकमा नेगेटिभ आयो र छैठौँपटक पनि नेगेटिभ आएपछि उहाँ पनि घर जानुभयो”, उनले भने।       चिकित्सक पोखरेलले रोग प्रतिरोधात्मक क्षमताकै कारण एकको छिटो र अर्कोको ढिलो नेगेटिभ रिपोर्ट आएको बताए।  “रोग प्रतिरोधात्मक क्षमताले नतिजा एकको छिटो र अर्को को ढिला आएको हो, उहाँहरूलाई हामीले अझै पनि होम आइसोलेसनमा बस्न आग्रह गरेका छौँ। धेरैले पुनःसङ्क्रमण हुने, नहुनेबारेमा जिज्ञासा पनि राख्नुभएको छ, पूर्णरूपमा हामीले सङ्क्रमण हुँदैन भन्न त सक्दैनौँ, तर हुने सम्भावनका निकै न्यून हुन्छ”, उनले भने।  धौलागिरि अस्पतालमा अहिले भेन्टिलेटरसहित सघन उपचार कक्षको काम पनि अघि बढेकाले अब अन्य बिरामीका लागि पनि विशेष सेवा दिन सक्षम रहेको जनाइएको छ।      गण्डकी प्रदेशका मुख्यमन्त्री पृथ्वीसुब्बा गुरुङले धौलागिरि अस्पतालका मेसु गोरखा दक्षिण बाहुको दाबेदार भएको बताएका छन्। उनले पोखराका पत्रकारसँगको कुराकानीमा भने, “बागलुङमा कोरोना सङ्क्रमण देखिएपछि मै हुँ, भन्ने डाक्टर पनि डराए तर, धौलागिरि अस्पतालका मेडिकल सुपरिटेन्डेन्ट डा. शैलेन्द्र पोखरेलले भने बागलुङमै भर्ना गरेर उपचार गर्छु भनेर हिम्मत देखाउनुभयो”, उनले भने, “बागलुङका डाक्टर, नर्स विशेष धन्यवादको पात्र हुनुहुन्छ, डा. शैलेन्द्र, प्रदीप श्रेष्ठ, नर्स दिदीबहिनी र चिकित्सक सबैलाई म धन्यवाद दिन चाहन्छु, उहाँहरूले आँट देखाउनुभयो र उपचार सम्भव भयो।”      उनले प्रशन्न हुँदै भने, “अहिले गोदबा (गोरखा दक्षिण बाहु) पाउने स्थिति भएको भए त गोदबा प्रथम पाउने डा. पोखरेल हुनुहुन्छ।”  मुख्यमन्त्री गुरुङले बागलुङका दुई सङ्क्रमित निको भएपछि गण्डकी प्रदेश तत्काल कोरोनाको रेड जोनबाट ग्रिन जोनमा पुगेको तर, अझै सतर्कता भने आवश्यक रहेकामा जोड दिए। जमुनावर्षा शर्मा/रासस