एकजना संक्रमित फेला परेपछि समुदायमा परीक्षण गर्न झापाको बाह्रदशी गाउँपालिका 'सिल' गरियो
<p>काठमाडौं। कोभिड-१९ का बिरामी भेटिएपछि थप संक्रमण फैलिन नदिन सावधानी अपनाउँदै झापाको बाह्रदशी गाँउपालिका 'सिल' गरिएको छ।</p>
<p>गाउँपालिकाको वडा नम्बर ४ निवासी ५० वर्षीय पुरुषमा हिजो, १४ वैशाखमा संक्रमण पुष्‍टि भएको थियो। उनको अहिले कोशी अस्पताल विराटनगरमा उपचार भइरहेको छ।</p>
<p>भारतबाट फर्किएका उनलाई संक्रमण पाइएपछि समुदायस्तरमा परीक्षण गर्न थालिएकाले आवतजावत लगायतका कुनै पनि गतिविधि पूर्ण रूपमा निषेध गरिएको गाउँपालिकाका अध्यक्ष खड्गप्रसाद राजवंशीले बताए।</p>
<p>संक्रमितको परिवारका सदस्य र सम्पर्कमा आएका व्यक्तिहरूको पहिचान गरी थ्रोट स्वाब नमूना परीक्षण गर्न लागिएको उनले बताए।</p>
<p>गाउँ कार्यपालिकाको बैठकले पूर्वमा कंचन मार्ग, पश्‍चिममा विरीङ्ग खोला, उत्तरमा पाख्रिवास, दक्षिणमा घाग्राखोला पुल चार किल्ला तोकेर गाउँपालिका 'सिल' गर्ने निर्णय गरेको हो।</p>
<p>दिल्लीको एक धार्मिक सभामा सहभागी भएर घर फर्किएको ४५ दिनपछि ती पुरुषलाई कोरोना संक्रमण पुष्‍टि भएको बताइएको छ।</p>
<p>यसअघि १२ वैशाखमा झापा दमकका ६२ वर्षीय पुरुषमा कोभिड-१९ देखिएको थियो।</p>
प्रतिक्रिया दिनुहोस्
.jpg)
