कसरी चल्दै छन् देशभरका क्वारेन्टाइन ?
<p>काठमाडौं। ओढ्ने, ओछ्याउने र आवश्यकता अनुसार झुलसहितको खाट, हावा छिर्ने कोठा। कोभिड-१९ रोगबाट जोगिन संक्रमणको खतरा हुन सक्ने व्यक्तिलाई राख्न बनाइने क्वारेन्टाइनको न्यूनतम व्यवस्था यस्तो हुनुपर्छ।</p>
<p>त्यसैगरी, नुहाउनका लागि पानीको व्यवथा, स्वास्थ्यकर्मी, २४ सै घण्टा सुरक्षाकर्मी (को निगरानी), स्वस्थ खाना र शुद्ध पिउने पानीको पनि व्यवस्था हुनुपर्ने क्वारेन्टाइन सञ्चालन तथा व्यवस्थापन गर्न बनेको मापदण्डले तोकेको न्यूननत शर्त हो।</p>
<p>वैशाख दोस्रो सातासम्म देशभर ३९ हजार ८२४ क्वारेन्टाइन बनेका छन्। तिनमा करिब १७ हजार व्यक्ति बसेका छन्।</p>
<p>सरकारले ती सबै क्वारेन्टाइन क्वारेन्टाइन सञ्चालन तथा व्यवस्थापन गर्न बनेको मापदण्ड अनुसार नै रहेको दाबी गरेको छ।</p>
<p>कोरोना भाइरस संक्रमणबाट जोगिन देश लकडाउन गरिएको एक महिना नाघ्यो। लकडाउन लम्बिदैं गएपछि धेरैले यसलाई उल्लंघन गर्नथालेका छन्।</p>
<p>काम गर्ने ठाउँमा काम बन्द भएपछि र गुजाराकै समस्या भएपछि धेरैजसो व्यक्ति हिँडेरै घर जान थाले।</p>
<p>यो अवस्था रोक्न नसकिने भएपछि गाडीको व्यवस्था गरेरै घर पठाउन लागेको छ। मन्त्रीहरुले नै गाडीको व्यवस्था गरेर आ-आफ्नो जिल्लाका बासिन्दालाई पठाउन थाले।</p>
<p>त्यसरी जिल्ला पठाइएकालाई सम्बन्धित स्थानीय तहले क्वारेन्टाइन तथा सेल्फ क्वारेन्टाइनमा राखेका छन्। </p>
<p>स्थानीय तहहरुले सीमित स्रोत साधनका बाबजुद क्वारेन्टाइनमा राखिनेहरुको व्यवस्थापन गर्दै आएका छन्।</p>
<p>सल्यानको बनगाड कुपिण्डे नगरपालिकाले पछिल्लो समय जिल्लामा भित्रिएका १११ जनालाई दुई विद्यालयको क्वारेन्टाइनमा राखेको छ।</p>
<p>नगर प्रमुख गोबिन्दकुमार पुनले स्थानीय स्रोत साधनको प्रयोग गरेर बनाइएको क्वारेन्टाइनमा उनीहरुलाई राखिएको बताए।</p>
<p>क्वारेन्टाइनका लागि तोकिएको मापदण्ड भने नगरपालिकाले पूरा गर्न सकेको छैन। बरु, कोठाभित्र म्याट किनेर बिछ्याएको छ।</p>
<p>नगर प्रमुख पुनले भने, “सबै कुरा मापदण्ड अनुसार नै गर्न सकिँदैन। केही कुराको अभावकै बीच क्वारेन्टाइन बनाएर राखेका छौं।”</p>
<p>पाँचथरका विभिन्न क्षेत्रमा काठमाडौंबाट घर फर्किएका तीन सय बढीलाई क्वारेन्टाइनमा राखिएको छ।</p>
<p>निर्माण गरिएका क्वारेन्टाइनमा बेड संख्या कम भएकाले बाहिरबाट आएका विद्यार्थी र मजदूरलाई विद्यालयको भवनमा राखिएको छ।</p>
<p>सुत्केरी महिलासमेत चिसो भुँइमा बस्न बाध्य भएको, अरुलाइ समेत कोचेर राखिएको फिदिमका सजिब आङ्बोले बताए।</p>
<p>“जिल्लामा सबै व्यवस्था गरिएको छ भनेर हामीलाई काठमाडौंबाट पठाइयो । यहाँ आएपछि चिसो भुइँमा राखियो”, उनले भने।</p>
<p>जिल्लाको तयारीबिना काठमाडौंबाट धेरै मान्छे पठाइँदासमस्या भएको पाँचथरको हिलिहाङ गाँउपालिकाका अध्यक्ष भवानी लिङ्देनले बताए।</p>
<p>“क्वारेन्टाइनको संख्या सिमित थियो। त्यसमा एकाएक थपिएपछि हामीले व्यवस्थापन गर्न सकेका छैनौं”, उनले भने। </p>
<p>रोल्पामा पनि ६ हजारबढी मानिस भित्रिएका छन्। उनीहरु सबैलाई क्वारेन्टाइनमा राखिएको छ।</p>
<p>उनीहरुलाई क्वारेन्टाइनमा राख्न समस्या भएको रोल्पाका प्रमुख जिल्ला अधिकारी लक्ष्मण ढकालले <em>देखापढी</em>लाई बताए।</p>
<p>क्वारेन्टाइनमा राख्न र उनीहरुको अवस्था बिग्रन नदिनेबारे सबै स्थानीय तहका पदाधिकारीसँग छलफल गरिएको उनको भनाई छ। </p>
<p>त्यस्तै ताप्लेजुङमा पनि स्थानीय स्रोत साधनको प्रयोग गरेर बनाइएको क्वारेन्टाइनमा साढे सात सयजनालाई राखिएको छ।</p>
<p><strong>यसरी पठाउने हो भने व्यवस्थापन गर्न सकिन्न</strong></p>
<p>गाउँपालिका महासंघका अध्यक्ष होमनाराण श्रेष्ठले स्थानीय तहसँग समन्वय नगरेरै बाहिरबाट जथाभावी पठाईंदा व्यवस्थापन गर्न समस्या भइरहेको बताए।</p>
<p>“धेरै स्थानीय तहले सिमित स्रोत साधनबाट बढीमा एक सय बेडसम्मका क्वारेन्टाइन निर्माण गरेका छन्। अहिले हजारको संख्यामा काठमाडौंलगायत अन्यत्र क्षेत्रबाट पठाउँदा कसरी व्यस्थापन गर्ने?”, उनले भने।</p>
<p>सरकारले एकातिर गुणस्तरीय क्वारेन्टाइन निर्माण गर्न निर्देशन दिने अर्कोतिर बजेट तथा आवश्यक स्रोत साधनको व्यवस्था नगरिदिँदा समस्या भइरहेको उनको भनाई छ।</p>
प्रतिक्रिया दिनुहोस्
.jpg)
