शेयर बजारलाई व्यवस्थित गरेर सञ्चालन गर्न लगानीकर्ता र ब्रोकर संघको माग
<p>काठमाडौं। शेयर बजारलाई व्यवस्थित गरेर पुनः सञ्‍चालन गर्न लगानीकर्ताहरूले माग गरेका छन्।</p>
<p>नेपाल आर्थिक पत्रकार संघ (नाफिज) ले आज आयोजना गरेको भिडियो कन्फरेन्समा लगानीकर्ता र स्टक ब्रोकर कम्पनीहरूले शेयर बजार सञ्‍चालन गर्नुपर्ने बताएका हुन्।</p>
<p>यसअघि गत १० चैतदेखि नेपाल स्टक एक्सचेञ्‍जले शेयर बजारको कारोबार बन्द गरेको थियो।</p>
<p>नेपाल इन्भेष्‍टर्स फोरमका निर्वतमान अध्यक्ष अम्बिकाप्रसाद पौडेलले शेयर बजारलाई अब लामो समय बन्द राख्‍न नहुने बताए।</p>
<p>उनले भने, “यसअघि नेपाल स्टक एक्सचेञ्‍च र नेपाल धितोपत्र बोर्डलाई लगानीकर्ताहरूले नै शेयर बजार बन्द गर्न दवाब दिएका थियौं। तर, यति लामो अवधि देश लकडाउनमा जाने अनुमान थिएन।”</p>
<p>उनका अनुसार अब धितोपत्र बोर्डले बजार खोल्न पहल लिनुपर्ने र त्यसका लागि लगानीकर्ता तयारी अवस्थामा रहेका छन्।</p>
<p>यस्तै, स्टक ब्रोकर एसोसियसनका अध्यक्ष भरत रानाभाटले लगानीकर्ता र ब्रोकरको सुरक्षालाई ध्यानमा राखेर बजारलाई सञ्‍चालन गर्नुपर्ने बताए।</p>
<p>त्यसका लागि ब्रोकरका कर्मचारीको सुरक्षामा ध्यान दिनुपर्ने बताए। यसअघि पाँच घन्टा कारोबार हुँदै आएको बजारलाई दुई घन्टामा सीमित गर्नुपर्ने रानाभाटको भनाइ छ।</p>
<p>यस्तै, शेयर बजार विज्ञ डा. गोपाल भट्टले शेयर बजार बन्द गर्न नहुने बताए। </p>
<p>लकडाउनको अवधि कहिलेसम्म लम्बिन्छ भन्‍ने जानकारी नभएकाले अब नियामक निकायले शेयरको कारोबार सञ्‍चालन गर्नुपर्ने उनको धारणा छ। </p>
<p>यसअघि लगानीकर्ताहरूले नै सेयर बजार बन्द गर्न नेपाल स्टक एक्सचेञ्‍जलाई दबाब दिएका थिए।</p>
प्रतिक्रिया दिनुहोस्
.jpg)
