रौतहटमा थप दुईजनामा कोरोना संक्रमण, जनकपुरस्थित प्रादेशिक अस्पताल लैजाने तयारी
<p>काठमाडौं। रौतहटमा थप दुईजनामा कोरोना संक्रमण पुष्टि भएको छ।</p>
<p>राष्ट्रिय जनस्वास्थ्य प्रयोगशाला टेकुमा गरिएको परीक्षणमा दुईजनामा कोरोना संक्रमण देखिएको हो।</p>
<p>स्वास्थ्य तथा जनसंख्या मन्त्रालयबाट प्रदेश २ मा खटिएको स्वास्थ्यकर्मीहरूको टोलीले रौतहटका विभिन्न क्वारेन्टाइनमा बसेकाहरूको थ्रोट स्वाबको नमूना संकलन गरेर काठमाडौं ल्याएको थियो।</p>
<p>ती नमूनामध्येकै दुईजनामा संक्रमण देखिएको स्वास्थ्य मन्त्रालय स्रोतले <em>देखापढी</em>लाई बताएको छ।</p>
<p>रौतहटको वृन्दावन नगरपालिका र देवाही गोनाही नगरपालिकाका दुईजनामा संक्रमण पुष्टि भएको आफूलाई जानकारी प्राप्त भएको देवाही गोनाही नगरपालिकाका नगर प्रमुख धर्मेन्द्रनाथ पटेलले बताए।</p>
<p>वृन्दावन नगरपालिका-९ भुसहा र देवाही गोनाही नगरपालिका-१ का पुरुषमा कोरोना संक्रमण पुष्टि भएको हो।</p>
<p>देवाही गोनाहीका ३५ वर्षीय पुरुष ४ वैशाखमा लुकिछिपी नेपाल प्रवेश गरेका थिए।</p>
<p>“उनी भारतबाट घर फर्किएको सूचना आएपछि हामीले ६ गतेदेखि क्वारेन्टाइनमा राखेका थियौं”, नगर प्रमुख पटेलले <em>देखापढी</em>सँग भने,“काठमाडौंमा जाँच गर्दा संक्रमण देखिएको केहीबेरअघि जानकारी प्राप्त भएको छ।”</p>
<p>उनका अनुसार कोरोना संक्रमण पुष्टि भएका दुवैजनालाई उपचारका लागि धनुषास्थित जनकपुर प्रादेशिक अस्पतालमा लैजाने तयारी भइरहेको छ।</p>
<p>वृन्दावन नगरपालिकाका युवक पनि भारतबाट फर्किएका थिए।</p>
<p>यसअघि रौतहटको इशनाथ नगरपालिकामा एकजनामा कोरोना संक्रमण पुष्टि भएको थियो। ती युवक भने निको भएर घर फर्किसकेका छन्।</p>
प्रतिक्रिया दिनुहोस्
.jpg)
