लकडाउनकाे एक महीनामा साढे चार हजार कन्टेनर सामान भैरहवा हुँदै नेपाल भित्रिए
<p>बुटवल। बन्दाबन्दी शुरू भएपछि भैरहवा भन्सार कार्यालय हुँदै चार हजार ५६२ कन्टेनर सामान भारतबाट नेपाल भित्रिएका छन्।</p>
<p>११ चैतदेखि ११ वैशाखसम्म (३१ दिन) साे संख्यामा कन्टेनरहरू भित्रिएका हुन्।</p>
<p>भारतबाट दैनिकरूपमा खाद्यान्न तथा हरियो तरकारी नेपाल भित्रिने क्रम पहिलेभन्दा बढेको भैरहवा भन्सार कार्यालयले जनाएको छ।</p>
<p>विशेषगरी एलपी ग्यास, डिजेल, पेट्रोल, खाद्यान्न, तेलहन तथा तेल, आलु, प्याज र तरकारी तथा फलफूल बोकेर आउने कन्टेनर बढी आएको भैरहवा भन्सार कार्यालयका प्रमुख भन्सार अधिकृत कमलकुमार भट्टराईले जानकारी दिए।</p>
<p>गत आर्थिक वर्ष २०७५/०७६ को यही अवधि ११ चैतदेखि ११ वैशाखसम्म त्यस्तो कन्टेनर संख्या तीन हजार ७५७ रहेको भन्सार कार्यालयका सूचना अधिकारी पूर्ण लम्सालले जानकारी दिए।</p>
<p>बन्दाबन्दीपछि राहत वितरण तीव्र हुनु र मानिसमा सामान किनेर भण्डार गर्ने प्रवृत्तिका कारण मागअनुसार भारतीय कन्टेनर खाद्यान्न तथा हरियो तरकारी बोकेर नेपाल आएको सिद्धार्थ उद्योग वाणिज्य संघका महासचिव नेत्रप्रसाद आचार्यले बताए।</p>
<p>लकडाउनपछि भारतीय तरकारी र खाद्यान्नको माग बढी हुनु तथा नेपालभित्र उत्पादित कृषि वस्तु बजारसम्म पुग्न कठिन भएकाले पनि बढी आयात भएको भैरहवा भन्सार कार्यालयले जनाएको छ। <em>रासस</em></p>
प्रतिक्रिया दिनुहोस्
.jpg)
